ئەس یا دهێم و دچم و بوویمە ڤەکولەرا دیتنا بنەمایێن خۆ یێن رەسەن، یێن من د رێکا وی تشتێ ب ناڤێ "پێشکەفتن" دا بەرزە کرین. کیژکە ئەزا دروست؟ کانێ ئەمێن دروست؟
دناڤبەرا خۆ نیاسین و لخۆ گەریان و ڤەدیتنێ دا، چەند باهوزەکێن ب هێز و دژوار هەنە کو رێکێ تاڕی دکەن و ناهێلیت گاڤێن خۆ یێن دویر ب رۆنی ببینم:
بارۆڤەک ژلایەکی دبێژیتە من: "تو نەشێی ژڤێ جیهانێ ب ڤەقەتی و ئێدی ئەڤ جیهانا خەیالی یا بوویە راستییا مە."
ژلایێ دی: بارۆڤا پاشڤەچوون و دەستبەردانا جڤاکی و دەستپێکرنا گوشەگیریێ.
ئەس هێدی هێدی یا هشیار دبم، بەلێ ژ چ؟ ئەڤێ خەوا گران ئەس کیڤە بریمە و دێ بەرێ من دەتە کیڤە؟
ئێدی من یا ژبیرکری دەیک و باب چنە! ئێدی من یا ژ بیرکری خێزان چیە! و ئەس یا خۆ دبینم ئێدی ب تنێ تشتەکی دنیاسم، ئەوژی "بەرژەوەندیا تاکی" یە: «خۆ بدانە دەستپێکێ دێ بسەرکەڤی، بەرژەوەندییا تە لبەری یا هەمیا یە، کەسێ سەرکەفتی ئەوە یێ چ تشت لبەری ئارمانجێت وی نە هێن». من بەری نوکە تشتەک ب ناڤێ وەفاداری و سۆزا خێزانێ ژی دنیاسی! خۆ گوریکرن و کوشتنا هندەک بەرژەوەندیا بو پاراستنا پەیوەندیێن خۆ یێن جڤاکی، بەلێ چەندددد دەمەکێ درێژە من نە دیتی! چەند یا سەیرە هوسا ژ نیشکەکێ من بێریا وێ کری!
ئێدی من یا ژبیرکری ئارمانج چیە؟ ئەو تشتێ من بو غارددا بێ راستیان، پەردەک بسەر هاتە دانان! پێت من یێت گران بووین و بەرەف راوەستیانێ نە! مێشکێ من یێ ئالوزە: ئەس کیڤە دچم؟ دێ کیڤە چم؟ بەرەف سەرکەفتنێ! ئەو سەرکەفتنا خۆ بوو من نە دایە نیاسین و ب تنێ گازی من کری ژ جهەکێ نە دیار و بەرزە: «بەرەف من ڤە وەرە و تو پێدڤی ب منی.» تو کی؟ تو چ تشتی؟ دێ لکیرێ ب دەست من کەڤی؟ ئێدی بوو من یا رۆن و ئاشکرا نینە!
ئێدی من یا ژبیرکری نەتەوە چیە! هەمییا ئەس بو دکەم ئەڤرۆکە پاریەکێ نانی یە؛ ئەو پاریە یێ تو هندی بخۆی ژێ تێر نابی و هندی پتر بیت داخازا پترێ دکەی؛ پاریێ خیانەتێ ل پاقژیا کارکرن و وەفاداریا پێشخستنا نەتەوا خۆ! چەند یێ بوویە پاریەکێ شرین!!
ئێدی من یا ژبیرکری ئایین و بنەما چننە!! هەمییا ئەس دزانم تشتەک یێ هەی ب ناڤێ نڤێژ و رۆژی، کرنا وانا لدەف خەلکی من عەزیز دکەت. ئەس نزانم چیە وەل من دکەت پێ راببم ، و چیە وەل خەلکی دکەت ب کرنا وێ من مەزن ببینن!
ئێدی من یا ژبیرکری رینشتنا دگەل کەس و کار و مروڤێن مەزن و خۆدان سەربوور یا چاوایە! من یا تام کریێ، بەلێ ل جیهانا راستی یان یا خەیالی وێژی نزانم! ئەو چ تشت بوو یێ دگووتنێ وەرگرتنا نەسیحەت و ئاموژگاریێن خۆدان سەربۆرا! ئەرێ خۆدان سەربۆر کینە؟
من ژبیرکر ئەس کیمە! من رێکا ڤەگەریانێ یا بەرزە کری. ئەرێ ئەس نوکە ئاکنجی مە یان ئاوارە؟ زانا مە یان نەزان؟ ئەرێ ئەس هەمە یان نینم؟ نە ئەز دزانم بەرسڤا خۆ بدەم! و نەژی دزانم رێکا دەرکەتنێ لکیڤەیە!
نڤیسین: شەهنام عگید.