دەربارەی گروپ و مالپەرێ کورداخ

بخێر هاتن هەمی، ئێکەم پارچە نڤیسین

دەسپێکێ، سوپاسییا هەمی کەسا دکەین یێت کو هاریکار بووین و پشکدار بوون و بوونە ئەگەر کو ئەڤ پروژەیە بچیتە د بورارێ بجهـ ئینانێ دا و دەسپێبکەت، ژدل سوپاس. ئەڤ مالپەرە بو خزمەتکرنا جڤاکێ مەیە و پێشڤەبەنا زمانێ کوردی. دێ ل ڤێ پارچە نڤیسینێ دا وەک ئێکەم نڤیسین بەحسی هندێ کەین کا ئەرێ ئەم کی نە یێت کو ل ب ڤی پروژەی رادبین؟ پەیاما مە چییە؟ هزرێن مە و ئارمانجێن مە ژ ڤی پروژەی، دیتنا مە بو پاشەروژێ و ئەرکێن مە چنە؟ دێ ب کورتی بەرسڤا ڤان پسیارا دەین، بێ کو وەختێ وە بەرزە کەین، دێ دەسپێکەین.

ئەم کی نە؟ کورداخ چییە؟ 

ماڵپەڕێ کورداخ ویبسایتەکە بو بەلاڤ کرنا گوتارا و پارچە نڤیسینا ب زمانێ کوردی، کو هەول ددەت ناڤەروکەکا نڤێسی یێ زەنگین و مفادار ب زمانێ کوردی بەردەست کەت. ئەم گوتارا ل سەر بابەتێن جورارجور، کورتە چیروک، نڤیسینێن وەرگێرای، کورتیێت پەرتووکا، و دەرئەنجامێت ڤەکولینێن ب مفا بەلاڤەدکەین. ئارمانجا مە ئەوە ئەم پشکداریێ بکەین کو د هندێ دا کو روژەکێ ناڤەروکا  نڤێسی یێ زمانێ کوردی ل سەر ئینتەرنێتێ بهێتە بەروارد کرن دگەل زمانێت بەربەلاڤ تر وەک زمانێ عەرەبی، یان ژی خو ئینگلیزی. ئەم یێت کو ل سەر ماڵپەڕێ کورداخ کار دکەین گروپەکێ گەنجاینە ژ 15 کەس زێدەتر پێک دهێت ژ دەرچوو و قوتابیێت زانکویێنە

ماڵپەڕێ کورداخ ل هەیڤا هەشت یا سالا 2024 ژلایێ گروپەکێ گەنجا ژ قوتابی و دەرچوویێت زانکویێ هاتییە دەمەزراندن.

مروڤەکێ هوسا سەرێ وی یێ د سندوقەکێ دا و دونیایێ نابینیت

ئەرێ ئەگەر تاکە کەسەکێ کورد ب زمانێ کوردی ل سەر گوگل ل بابەتەکێ نڤیسای بگەریت، دێ گوتارەک یان پارچە نڤیسینەک مفادار ل سەر بابەتی ب کوردی بینیت؟ د ئەساس دا بەرهەمێ نڤێسی یێ مفادار ب زمانێ کوردی ل سەر ئینتەرنێتێ هەیە؟ ئەم ڤی کەسی یێ کو سەرێ وی د سندوقەکێ دا و دونیایێ نابینیت ژبەر وی سندوقی ب خواندەڤایێ کورد یێ کو دڤێت ب زمانێ کوردی بخینیت بەراورد دکەین. 

• ئەو کەس خواندەڤایێ کوردە

• ئەو سندوق ژی رێگرێ زمانی یە و نەبوونا بەرهەمەکێ مەزن و مفادار یێ کوردی ل سەر ئینتەرنێتێ یە

ل کورداخ ئەم هەول ددەین کو هندەک شەقێت بچیک ل وی سندوقی بکەین و هیدی هیدی وان شەقا مەزن تر بکەین دا کو روژەکێ ئەو سندوق نەمینیت، یان هەر هەر چ نەبیت ئەم پشکداریێ د هندێ دا دکەین، چنکی راکرنا ڤی سندوقی ب یێک جاری کارەکە ب ئێک یان ژی خو دەهـ و بیست مالپەران نابیت، بەلکو ئەڤە کارەکێ گەلەک مەزنە کو پێتڤییە گەلەک کەس کار ل سەر بکەن حەتا رویبدەت.

ئەو پارچە نڤێسینێن ئەم بەلاڤە دکەین:

1. گوتار
2. پارچە نڤێسینێت وەرگێرای
3. کورتە چیروک
4. کورتکرنێت پەرتووکا
5. گوتار ل سەر دەرئەنجامێت ڤەکولینێت زانستی

ئەو بابەتێن ئەم بەحس دکەین ئەڤەنە

جڤاک، دەروون، سیاسەت، وێژە، ساخلەمی، پەرتووک، ئابوور، زانست، ئایین، گەشەپێدان، پەروەردە، رەخنە، تەکنولوژی و ڤەکولین

پەیاما مە چییە؟

مە دڤێت ل ماڵپەڕێ کورداخ وێ پەیامێ دگەهینن کو شیانێن گەنجان چ سنور بو نینن، و قوتابیێت زانکویێ دشێن رولەکێ مەزن دناڤا جڤاکێ خو دا بگێرن، ماڵپەڕێ کورداخ ژی وەک نموونەیەکێ بو هندێ ددانین

دیتنا مە بو پاشەرۆژێ:

مە دڤێت ئەم ببنە ویبسایتەکێ بەربەلاڤ و گرنگ بۆ نڤیسین و گوتارێن زمانێ کوردی، دا کو ئیلهامێ ببەخشین و پێزانینێن گرنگ بگەهیننە خواندەڤانان ل سەر بابەتێن جوراجور، بو پشتەڤانییا جڤاکەکێ زانا وبەرهەمهێنەر.

ئەرکێن مە ل مالپەرێ کورداخ:

1. ئەم وان دەرفەتا و ئامرازا بو قوتابی و دەرچوویێت زانکویێ بەردەست دکەین کو بشێن دەربرینێ ژ خو بکەن، هزر و زانینا خو بەلاڤ کەن وبەرهەمدار بن بو جڤاکێ خو.
2. ئەم گوتار و پارچە نڤیسینا و کورتیێت کتێبا بو خواندەڤایێ کورد بەردەست دکەین، دا کو هزرێن بەرفرەهـ تر هەمبێز بکەت.
3. ئەم بەرهەمەکێ مفادار، گوتار و نڤیسینێن کوردی، بەلاڤە دکەین، دا کو هەبوونا زمانێ کوردی ل سەر ئینتەرنێتێ دەولەمەند کەین
4. ئەم هزر و بیر و بوچوونێت جیاواز و پێزانینێن مفادار ب زمانێ کوردی بەلاڤەدکەین.
5. ئەم هەول ددەین رەوشەنبیریا قەبوولکرنێ، پێکڤە ژیانێ و لێک تێگەهشتنێ ناڤبەرا خەلک و گرۆپێن جیاواز ناڤ جڤاکی دا بەلاڤە بکەین.
6. ئەم هەولا پشتەڤانی کرنا گەنگەشێ، بهێز کرنا هزرا رەخنەگر، بهێزکرنا جڤاکان وپشتەڤانی کرنا زمانێ کوردی دکەین

هیڤی دکەم ب ڤێ پارچە نڤیسینێ مە شیابیت ئەم خو ب دروستی ب هەوە بدەینە نیاسین و جابا گرنگترین پسیارێت هەوە بکەین، ئەگەر کەسەک حەز هەبیت ببیتە نڤیسەر وەک خوبەخش دگەل مە، سەرەدانا پەیجێ "ببە نڤیسەر" بکە ل بنێ مالپەرێ. سوپاس بو هەوە