ھەر پرۆژەیەک بێگومان د زڤرۆکەکا ژیانێ یا رێکخستی را دەرباز دبیت، و قۆناغا پلاندانانێ قۆناغا دووێ یە ژ ژیانا پرۆژەی. قوناغێن پرۆژەی ئەڤەنە: دەسپێکرن، پلاندانان، ئەنجامدان، و ب دوماهیک ئینان. قۆناغا پلاندانانێ ژی ئێکە ژ گرنگترین قوناغێن پرۆژەی، کو چارچووڤەکێ دیار بۆ بجهئینانێ ددانیت و خشتەیێن دەمی، بودجە، و پلانا بڕێڤەبرنا مەترسیان ب خۆڤە دگریت. ئاڤاکرنا بنەمایەکێ بھێز د ڤی دەمی دا گرنگە دا کو ھەمی ئەندامێن تیمی بەرپرسیارەتیێن خۆ بزانن و پرۆژە ل سەر رێکا دروست بمینیت ژ دەستپێکێ ھەتا دوماھیێ.
ئاڤاکرنا پلان و خشتەیێ پرۆژەیێ
دا کو ب باشی کارێ ل پێشیا خۆ رێکبێخی، پێدڤیە تو پلانەکێ بۆ پرۆژەی چێکەی، کو وەک بەلگەنامەیەکێ کار دکەت بۆ تۆمارکرنا قەبارە (سنوور)، ئەرک، دەرئەنجامێن گرنگ، و چالاکیێن گشتی یێن پرۆژەی. پلانەکا رێکخستی ب گشتی ئەڤان پێنج پێکھاتەیێن سەرەکی ب خۆڤە دگریت: ئەرک، دەرئەنجامێن گرنگ، کەس (تیم)، بەرپرسیارەتی، و دەم. بنەمایێ ڤێ پلانێ ژی ل سەر دیارکرنا ھەر ئەرکەکێ پرۆژەی دهێتە ئاڤاکرن، کو دیارکرنا چالاکیێن پرۆژەی و دەمێ پێدڤی بۆ هەر چالاکیەکێ بخوڤە دگریت. گەلەک جاران، ئەڤ چالاکیە دھێنە دابەشکرن بۆ ئەرکێن بچویکتر (لاوەکی)، کو پێدڤینە بۆ بجهئینانا ئەرکەکێ مەزنتر.
دەمێ کار بەرەڤ پێش دچیت، تیمێ تە دێ گەھیتە خالەکا گرنگ (Milestone)، کو خالەکا گرنگە د خشتەیێ پرۆژەی دا و پێشڤەچوونا پرۆژەی دیار دکەت و هندەک دەرئەنجامان ب دوماهیک دئینیت. ئەڤ ھەمی چالاکیە ل سەر خشتەیێ پرۆژەی دھێنە نڤیسین، کو دەمێ پرۆژەی دیار دکەت و هەر وەسا رۆژا دەستپێکرنێ، رۆژا دوماھیێ، و رۆژێن دەرئەنجامێن گرنگ یێن د ناڤبەرا وان دا ب خۆڤە گریت. پێکڤە، ئەڤە دبیتە بنەمایێ بڕێڤەبرنا پرۆژەیێ تە، و خالەکا دەستپێکێ یا جێگیر و روون بۆ پرۆژەیێ تە ددانیت کو قەبارە، بودجە، و خشتەی ب خۆڤە دگریت.
تەرخانکرنا بودجەی
پرۆژەیێن سەرکەفتی پێدڤی ب پلاندانانەکا دارایی یا ھویر و ستراتیژی ھەیە. تو دێ ڤێ چەندێ ب رێکا دیارکرنا بودجەیا پرۆژەی کەی، کو ئەڤ بودجە دیاردکەت کا دێ چاوا سەرچاوەیێن پێدڤی بۆ گەھشتن ب ئارمانج و مەرەمێن پرۆژەی هێنە بکارئینان. ل ناڤ ڤێ بودجەی دا، پێدڤیە تو چاڤدێریا تێچوویێن راستەوخۆ بکەی، کو ئەو تێچوویەنە یێن راستەوخۆ د پرۆژەی دا پەیدا دبن، ھەروەسا تێچوویێن نەراستەوخۆ ژی، کو ئەو تێچوویەنە یێن نەشێن راستەوخۆ ب پرۆژەی ڤە بھێنە گرێدان.
بڕێڤەبرنا مەترسیێن چاڤەڕێکری (پلانا مەترسییا)
چ پرۆژە ب تەمامی ژ ئاستەنگ و ئاریشەیێن نەچاڤەڕێکری د پاراستی نینن، لەوا بڕێڤەبرنا مەترسیان گەلەک یا پێدڤی و گرنگە. ئەڤ کارە پرۆسەیا دیارکرن و ھەڵسەنگاندنا مەترسی و ئاریشەیێن چاڤەڕێکری بخوڤە دگریت، یێن کو دشێن کارتێکرنێ ل پرۆژەی بکەن. د بڕێڤەبرنا پرۆژەی دا، مەترسی (risk) رویدانەکا چاڤەڕێکریە کو دبیت روی بدەت و کارتێکرنێ ل پرۆژەی بکەت، بەلێ پا ئاریشە (issue) ئاریشەکا رویدای و راستەقینەیە کو کارتێکرنێ ل شیانێن بجهئینانا ئەرکەکێ دکەت. پلانا مەترسییا ژی هەوڵا پێشبینی کرنا ئاریشا دکەت، و لێگەریانێ ل چارەسەرییا، بەری روی بدەن.
بۆ سەرەدەریێ دگەل ڤان مەترسییان ب شێوەکێ باش، پێدڤیە تیم ھەڵسەنگاندنەکا گشتگیر بۆ مەترسیان بکەن. ئەنجامێن ڤێ ھەڵسەنگاندنێ ژی ب ھویری د ناڤ پلانەکا بڕێڤەبرنا مەترسیان دا دھێنە کۆمکرن، کو دهێتە بکارئینان وەک بەلگەنامەیەکا زیندی بۆ پێزانینان دەربارەی مەترسیێن دیارکری، ب رێکا دیارکرنا رێژەیا پێشبینی کری بۆ رویدانا هندەک مەترسییان و کارتێکرنا وان، و پلانێن کێمکرنا دەرئەنجامێن وان.
دەرئەنجام
ب رێکا نڤیسینا پلان و خشتەیێ پرۆژەی، و بودجە، و پلانا مەترسییا، دێ رێکێن دیفچوونا پرۆژەی د قوناغێن بهێت دا هەمی بەردەست بن. پشتی قوناغا پلاندانێ، هەر دەمێ هەمی بەلگەنامەیێن پێدڤی بەردەست دبن، قوناغا بجهئینانێ دهێت، کو دێ ل جارا بهێت بەحس کەین. سوپاس بۆ خاندنێ و هیڤیا مفایی
نڤیسین: احمد مصطفى
ژێدەر:
Google Project Management Professional Course