لینکدئین پلاتفۆرمەکە هەر وەک توڕێن کۆمەڵایەتی یە، لێ بۆ هەڤنیاسینا پیشەیی یە. ب ڕۆڵێ گەهاندنا خەلکی و کارخازان دکەت دگەل خۆدان کار و کۆمپانی و بیزنس و رێکخراوان. جیاوازییا ڤی پلاتفۆرمی دگەل توڕێن جڤاکی یێن دی ئەوە کو بۆ بەلاڤکرنا رۆژانێن کەسی و خێزانی و هەڤالا نینە، بەلکو بۆ بەلاڤکرنا پێزانین و شیانێن کەسا یێن پیشەیی یە. رێکێ ددەتە بکارهێنەرا کو پرۆفایلەکێ پیشەیی چێکەن و خاندن و باوەرناما خۆ، هەر وەسا سەربوڕێن کاری، شیان و بەهرە، و ئەنجامێن کارێ خۆ بەلاڤ کەن. هاری تاکەکەسا ژی دکەت کو پەیوەندیێن بهێز دگەل هەڤالێن پیشەی، خۆدان کار و کۆمپانی، و ئەوێن ل کارمەندا دگەڕن، و کەسێن تێگەهشتی د بوارێ کاری دا ئاڤا بکەن. ژبەر هندێ ژی لینکدئین ئامرازەکێ گەلەک گرنگە بۆ ڤەدیتنا دەرفەتێن کاری، هەڤنیاسینا کارمەندا و خۆدان کارا، و هەر وەسا گەشەپێدانا پیشەیی. کۆمپانی و رێکخراوێن جیاواز دەرفەتێن کاری ل سەر ڤی پلاتفۆرمی بەلاڤە دکەن، هەر وەسا هەمی نووچەیێن گرێدای ب ڤان کۆمپانیا ل سەر دهێنە بەلاڤ کرن. هەر وەسا هندەک بکارئینانێن دی ژی هەنە بۆ لینکدئین، وەک بەردەست کرنا کورسێن گەشەپێدانێ، و بابەتێن نڤیسای یێن گرێدای ب پیشە و کاری ڤە. لینکدئین ژبەر گەلەک ئەگەرا بۆ قوتابیێن زانکۆیێ گرنگە کو هەر ل زانکۆیێ بۆ خۆ چێکەن، دێ نوکە ژی بەحسی هندەک ژ گرنگیێن وی کەن.
بۆچی یا گرنگە بۆ قوتابیێن زانکۆیێ؟
- هەبوونەکا دیجیتاڵ بۆ پێزانێن تە یێن پیشەیی و کارێ تە بەردەست دکەت، کو د شیان دا هەر کەسێ بڤێت و ل هەر دەمێ بڤێت ببینیت ل پێزانینا ل سەر شیانێن تە بزانیت.
- دەرفەتێن هەڤنیاسێنێ: دەرفەتێ ددەتە قوتابییان کو پەیوەندییا گرێبدەن دگەل کەسانێن شارەزا، دەرچووێن زانکۆیێ و خۆدان کار، و هەر وەسا کەسێن ل کارمەندا دگەڕن.
- دوماهیک زانیاری ل سەر دەرفەتێن کاری و دەرفەتێن مەشق و راهێنانێ: هەر دەمێ تە لینکدئین هەبوو، تو دشیێ دوماهیک زانیاری ل سەر کارێ خۆ، و ل سەر کۆمپانی و رێکخراوێن تە حەز ل سەر هەی، و ل سەر دەرفەتێن کاری و مەشقێ ب دەست خۆڤە بینی.
- براندێ کەسی: دەرفەتێ ددەتە قوتابییا کو شیانێت خۆ و کار و سەرکەفتنێت خۆ نیشا خەلکی بدەن، کو بهێنە نیاسین وەک کەسێن شارەزا و خۆدان سەرکەفتنێن باش. ئەڤە دبیت ببیتە ئەگەر کو ل پاشەرۆژێ کارەکێ بۆ خۆ ببینن.
- فێربوون و گەشەکرن: هندەک کورسێن بێ بەرامبەر ژی هندەک جارا بەردەست دکەت، هەر وەسا بۆچوون و زانیاریێن گرنگ ل سەر پیشە و کارێ تە ژلایێ کەسێن شارەزا تێدا دهێتە بەلاڤ کرن.
- پرۆفایلێ تە یێ بەرچاڤە بۆ کەسێن ل کارمەندا دگەڕن: گەلەک کۆمپانی و رێکخراو ب شێوەکێ چالاک ل کارمەندا ب رێکا لینکدئین لێدگەڕن، دبیت جارەکێ ژی پرۆفایلێ تە بکەڤیتە بەر دەستێ وان.
- بۆ CV باشە: ل دەمێ CV یێ خۆ چێدکەی، دشیێ و گەلەک باشە ژی لینکێ پرۆفایلێ خۆ بدانیە سەر. کو دبیت وەرگرتنا تە ل کاری باشتر بکەت و دەرفەت زێدەتر لێ بهێت.
- بۆ پێشکێشکرنێ بۆ دەرفەتێن خاندنا بلند: گەلەک و گەلەک پرۆگرام یێن پشتەڤانییا قوتابییا بۆ خاندنا بلند وەک ماستەر یان دکتورا داخاز دکەن کو پرۆفایلێ خۆ یێ لینکدئین بۆ وانا فرێکەی.
- گەلەک ئەگەرێن دی ژی هەنە و گەلەک مفایێن دی بۆ هەنە، لێ ئەڤە خالێت سەرەکی بوون.
چ بەشا دشیێ ل سەر پرۆفایلێ خۆ بدانی؟
- وێنەیا کەسی و وێنەیا پاشخانەی: وێنەکا خۆ یا کەسی یا روون و فەرمی بدانە، و پاشخانەکێ بدانە کو دەربڕینێ ژ باوەریێن تە دکەت دەربارەی کاری دکەت.
- سەرنڤیس (Headline): ڕستەکا کورت ل بن ناڤێ تە کو دیاردکەت ب کورتی کا تو کیی و تە چ شیان هەنە؟ وەک: قوتابیێ کومەڵناس | چالاکڤانێ جڤاکی.
- پێزانین ل سەر تە (About): کورتییەک ژ بڕگەکێ یان پتر وەک پێزانین ل سەر تە، ئارمانجێن تە، شیان و بەهرەیێن تە، و تە حەز ل سەر چ هەیە؟
- خاندن و باوەرنامە (Education): پێزانینێن هویر ل سەر زانکۆیا تە لێ خاندی، بەشێ تە خاندی، و باوەرناما تە وەرگرتی، و سالا دەرچوونێ. هەر وەسا دشیێ ئەو کورسێن تە خاندی، رێزلێنان هەکە تە وەرگرت بیت، و هەر وەسا پرۆژەیێن خۆ ل زانکۆیی بەحس کەی.
- سەربوڕا کاری (Experience): بەحسی هەر مەشقەکێ کاری، یان ژی کارێن نیڤ دەوام، یان ژی کارێن خۆبەخشی، یان ژی هەر کارەکێ دی بکە.
- بەهرە و شیان (Skills): لیستەکا بەهرەیێن پیشەیی و شیانێن کەسی و شیانێن نەرم کو خالێن هێزێ ل نک تە دیاردکەت. وەک: شیانێن پەیوەندیکرنێ، شیکارییا داتایان، و سەرکردایەتی.
- لیستا (Certificates) باوەرنامەیێن خولا، و وورکشوپا و هەر باوەرنامەکا دی یا نە ئەکادیمی، خۆ باوەرنامەیێن تە ئۆنلاین وەگرتین ژی دشیێ ل ڤێرێ بدانی.
- پرۆژە (Projects): پرۆژەیێن ئەکادیمی یان یێن قازانج خواست یان یێن قازانج نەخواست. دا کو بشیێ شیانێن خۆ پێشان بدەی و هەر وەسا حەز و ئارەزوویێن تە یێن کاری دیار بکەی.
- هەر وەسا بەشێن دی ژی هەنە وەک سەربوڕێن کارێ خۆبەخشی، و حەز و ئارەزوویێن کاری، و گەلەکێن دی، لێ ئەوێن مە بەحس کرین، ئەو یێن سەرەکینە.
دەرئەنجام
دگەل ڤان هەمی مفا و قازانجێن چێکرنا پرۆفایلەکێ لینکدئین، بۆ من بخۆ وەک کەس، من مفایەکێ دی ژی ژێ دیت. ئەو ژی کو ل دەمێ من پرۆفایلەکێ هوسا بۆ خۆ چێکری، من پتر حەز هەبوویە کو پشکداری کارێن دەرڤەی خاندنێ بکەم، دا کو بشێم ل سەر پرۆفایلێ خۆ نیشان بدەم. ل دوماهیکێ ژی، چ جارا یا درەنگ نینە کو بۆ خۆ چێکەی، ئەگەر خۆ تو قوتابیێ زانکۆیێ ژی نەبی، یان تو یێ دەرچووی بی، هەر مفایێن گەلەک مەزن هەنە بۆ پاشەرۆژێ بۆ خۆ چێکەی. سوپاس و هیڤیا مفایی.
نڤیسین: احمد مصطفى