رەنگا رۆلەكێ گرنگ هەیە دژیانا مە یا رۆژانە دا، كاریگەریێ لسەر هەست و هزر و بیرا دكەن، هەروەسا لسەر دیتنا مرۆڤی بۆ تشتێن دەوروبەر، و ئەڤ كاریگەرییە ب سایكۆلۆژیا رەنگان دهێتە نیاسین. بوارەكە ڤەكۆلینێ دكەت دچاوانیا بەرسڤدانا مێشكی بۆ رەنگان و چاوانیا كاریگەریا رەنگان لسەر رەفتارێن مرۆڤی. هەر رەنگەكی هێزەكا دەستنیشانكری هەلدگریت كو ب شێوازەكێ جیاواز كاریگەریێ لسەر هەستێن مە دكەت. بۆ نمونە; رەنگێ سۆر هێزێ پالددەت و هەستكرن ب حەماسێ لدەف مرۆڤی بلند دكەت، دهەمان دەم دا بەلكی پەیوەندی ب تۆرەیێ ژی ڤە هەبیت. دبەرانبەر دا رەنگێ شین پێشبینیا ئارامی و باوەریێ دكەت. ژبەر هندێ گەلەك جاران ل دام و دەزگەهـــ و بەنكان دا بۆ پەیداكرنا هەستێ پشتراستی و سەقامگیریێ رەنگێ شین بكار دهێت، رەنگی زەر نیشانا گەشبینی و بەختەوەریێ یە، بەلێ هەگەر گەلەك بهێتە بكارئینان دبیت بێزاركەر بیت.
زانستێ رەنگان دگەلەك بواران دا بكار دهێت وەك ماركێتینگ، دیزاینا ناڤەرۆكان، دیزاینا بەرهەمان. بۆ نمونە خوارنگەهـــ رەنگێن سۆر و پرتەقالی بكار دئینن ژبەر ئەڤ رەنگە هاریكارن بۆ هندێ حەزا مرۆڤی بۆ خوارنێ دروست بیت. هەروەسا نەخۆشخانە ڕەنگێن ئارامیێ شین و كەسك بكاردئینن ژبەر هاریكارە بۆ نەخۆشی بهنا خۆ بدەت.
رامانا رەنگان ژ كەلتورەكی بۆ ئێكێ دی جودایە. ل كەلتورێن رۆژئاڤای دە سپی نیشانا پاقژیێیە بەلێ دهەمان دەم دە ل كەلتورێن رۆژهەلاتی دا سپی گرێدای مرنێ و خەما یە. ل هندەك وەلاتێن ئیسلامێ دە رەنگێ كەسك نیشانا باشی و نیعمەتێ یە، كو دبەرانبەر دا ل هندەك كەلتورێن رۆژئاڤای دبیت ب نیشانا حەسودیێ بهێت.
مرۆڤ دشێت مفای ژ سایكۆلۆژیا رەنگان وەرگریت دژیانا خۆ یا رۆژانە دا، بۆ نمونە لبەركرنا ڕەنگێن ئارام لجهێ كاری هاریكارە بۆ باشكرنا تەركیزا مرۆڤی، و هەلبژاردنا ڕەنگێن گەش لناڤ مالێ دە هەستێ دلخۆشیێ بلند دكەت.
هەروەسا رەنگا د پرۆسا چارەسەركرنا دەرونی دا رۆلەكێ گرنگ هەیە، كو هاریكاریا مرۆڤی دكەن بۆ باشكرنا بارێ دەرونیێ وان.
ڕەنگ نە بتنێ ئامرازە بۆ خۆ جوانكرنێ، بەلكو هێزەكا دەرونییە كو بشێوەیەكێ كور كاریگەریێ لسەر هزركرن و رەفتارێن مە دكەت. ڤێجا تە بڤێت رەنگەكی بۆ ژوورا خۆ هەلبژێری یان رەنگێ جلكێن خۆ یان تە پرۆژەكێ بازرگانی هەبیت، تێگەهشتنا سایكۆلۆژیا ڕەنگان دشێت هاریكار بیت بۆ بریاردانەكا پشتراست و كاریگەرتر.
نورهان علی