ئەڤرۆ ئەم دجیهانەكێ دا دژین كو یێن نقوم بوین د خۆشیان دا. كو هەمی تشت ب شێوەیەكی هاتیە دیزاینكرن كو جوانتر و بتامتر و سەرەنجراكێشتر دیاربیت ژ هندێ كا دبنیات دا چاوایە. ئێدی ژیان وەكی بەرێ نەمایە كو بتنێ هەولدان پێخەمەت مانێ بیت، بەلكو هەڤركیا بەردەوامە بۆ تێركرنا بلەز یا حەزێن بێ دوماهی، ژ خوارنێ بگرە تا تەكنەلۆژیا، ژ كاركرنێ تا دەمبۆراندنێ. وەسا دیاردبیت كو دڤێت هەمی تشت خۆشیێ ببەخشیت تا ئەنجامبدەین، وەسا بویە كو پێكۆلكرن و ئێش و ئازار ب گونەهـــ حساب بن. بەلێ پا دا جارەكێ راوەستن و بپرسن: ئەرێ ئەڤا چێدبیت تشتەكێ نۆرمالە؟ ئەرێ ئەم هەردەم دوەسا بووین؟
دبۆری دا خوارن بتنێ ئامرازەك بوو بۆ مانێ و جل و بەرگ بۆ پاراستنا لەشی، ئامرازێن ڤەگوهاستنێ بۆ برینا رێكێن درێژ پێخەمەت ئەنجامدانا كارێن پێتڤی یێن رۆژانە.
ئەڤرۆ هەمی تشت ب دیتنەكا بەروڤاژی دهێت دیتن. خوارنێ دخۆین بۆ خۆشی، جلكا لبەر دكەن بۆ هندێ دسەرەنجاكێش بین، ترۆمبێلا دكرین بۆ راكێشانا سەرەنجا دەوروبەرا، رستا (یا بۆ تە خۆش بكە) یا بوی زۆرترین رستە كو بهێتە گۆتن. بەلێ هزرا خۆ بكە ئەگەر ژیان بتنێ وەرگرتنا خۆشیێ بیت دێ ئەنجام چ بن؟! لاوازیەكا بێ وێنە! ئێدی مرۆڤی ئیرادە نامینیت بۆ ئەنجامدانا كارێن پێتڤی، بتنێ ژبەر كو ب ئەنجامدانا ڤان كاران خۆشیێ وەرناگرین. نەشێن دەستا ژ خوارنا بلەز بەدەین هەر چەندە دزانین یا بزیانە، نەشێن موبایلا دانین و بەردەوام بین لسەر خواندنا خۆ هەر چەندە دزانین كا چەند گرنگە. ئەم بوینە عەبدێن حەز و ئارەزۆیێن خۆ و دەمێ ژ مە بهێت داخوازكرن وان كارێن پێتڤی ئەنجام بدەین، دبێژن (ئەز نەشێم) دراستیدا ئەم دشێین، بەلێ مە نەڤێت. و ل دوماهیێ دڤێت تشتەكێ سادە و دهەمان دەم دا گرانبەها فێربین.. نە مەرجە خۆشیێ ژ هەمی تشتا وەرگرین، ئەگەر تە بڤێت خوارنا تەندروست بخۆی چاڤەرێ نەبە بتام بیت، بتنێ بخۆ. ئەگەر تە ڤیا موبایلێ دانی و بخوینی چاڤەرێ دەمێ گونجای نەكە هەر ئێكسەر دەستپێبكە.
گۆرانكاری ژ بسەربرنا خۆشیێ پەیدا نابەن، بەلكو ژ پراكتیكرنا سەبر و خۆلبەرگرتنێ پەیدا دبەن. ئەو یا پێتڤی بكە ئەگەر یا خۆش ژی نەبیت، هەتا كو ئەگەر یا بێزاركەر ژی بیت هەر ئەنجام بدە، ژبەر كە ئەگەر تە ئەنجام نەدا دێ ل چالەكا خۆشیا وەهمی دا خەندقی.
نڤیسین: نورهان علی