ئەز ژ دایک بووم وەک زارۆکەکێ نورمال، من رەفتار دکرن وەک هەر کەسەکێ دهەبوونێ دا بەلێ رۆژ بۆ رۆژێ ڕەفتارێن من سەیر و جێوازتر لێ دهاتن. ئەز نەشیام خۆ بگونجینم دگەل دەوروبەرێن خۆ و چ کەس د من نەدگەهشت و بەردەوام پێکول دکرن کو من بێدەنگ بکەن ئەوان هزردکر کو ئەو یێ دلخوشیێ بۆ من دروست دکەن و یێ من ب پەیڤ و کریارێن خۆ ئارام و باشتر لێ دکەن، بەلێ ئەو نزانن کو تێکچوونەک یا ل دەڤ من هەی ئەوا ناسیار ب ( ئوتیزم).
ئەز زارۆکەکم من ئوتیزم یا هەی کو گەلەک کەس هزردکەن ئەڤە نەخوشیەکە تووشی من بووی بەلێ دراستیدا ئەو نە نەخوشییە بەلکی تێکچوونەکە دگەشەییا دەمارێن مێشکی دا، و ئەڤێ تێکچوونێ وەل من کر کو ئەز بهێمە تایبەتمەندکرن و جوداکرن ژ کەسانێن ئاسای، راستە ئەز نەشێم وەک تە ب شێوەیەکێ جوان سەرەدەریێ بکەم بەلێ پا ئەز زیانێ ژی ناگەهینمە تە.
ژمن نەڕەڤە و نە ترسە ئەز پێتڤی تەمە و من نە ڤەشێرە هەر وەکی من تاوانەک یا کری بتنێ ئەز زارۆکەکێ بێ گونەهم و من چ گونەها خۆ نینە، رۆژ بۆ رۆژێ هندەک نیشان ل دەڤ من دیاردکرن بەلێ ئەز تێنەدگەهشتم ئەڤە چییە دگەل من روویدەت و ئەڤ نیشانە دجورەوجور و جێوازبوون دهەر قوناغەکا تەمەنی دا رەنگە گوهورین بسەر دا بهێن ئەڤجا ب هویری و هوشیاری سەرەدەریێ دگەل من بکە، ژوان نیشانان ژی :
من چاڤ نقاندنەکا زێدە یا هەی (زێدەتر ژ ئاستێ سروشتی) و ئەز ب دروستی تەماشەی چاڤێن تە ناکەم دێ بێژی هەروەکی ئەز گرنگیێ ب تە نادەم ژبەرکو ئەز پتر گرنگیێ ب هەبوونا تشتان ددەم، و ئەز دەستێن خۆ دلڤینم دا کو بشێم ب رێکا وان ئاماژێ ب هەر تشتەکێ دناخێ من دا هەی بدەم ژبەرکو من وەکی تە زمانەکێ رێکخستی و رێک و پێک نینە، بو من یا ب زەحمەتە ئەز پیتان لێکبدەم و پەیڤەکێ ژێ دروست بکەم و پێ دەربرینێ ژ پێدڤیاتی و هەستێن خۆ بکەم ژبەرهندێ ئەگەر تو دگەل من نەبی ئەز نەشێم فێرببم و بخوینم وەکی هەر زارۆکەکێ دیتر یێن کو سپێدەهییان ژ خەو رادبیت و قەستا قوتابخانێ دکەت و ماموستا ئەوان ب رەنگەکێ جوان فێری خواندنێ و نڤێسینێ دکەت، هزربکە دەستێن من ب زەحمەت پێنووسی دگرن هەتا کو بشێم ب دروستی بنڤیسم پێتڤی هاریکاریێ دبم و ئەز ئالوز دبم دەمێ هاوکێشەیەکا بیرکاریێ دبینم و مێشکێ من دوەستیێت هەتا کو ئەز چارەسەریێ بۆ دبینم،و من زۆر هەستیاری یا ژ جل و بەرگان هەی ئەڤجا هیڤیدکەم بێزارنەبە دەمێ بۆ من یا نەخوش بیت کو ئەو جل و بەرگێن تە بۆ من هەلبژارتین لبەرخۆ بکەم، و من لڤینەکا زۆر و ڕەفتارێن نە دجهێ خۆدا و یێن دووبارە و جێگیر یێت هەین کو دبنە ئەگەرێ نەخوشیێ ژبۆ دەوروبەرێن من، ل هەر جهەکێ ئەز دەنگەکێ زۆر بلند گوهـ لێ دبم ئەز هەستیاردبم ژبەرهندێ هەر زوی دکەمە گری و ئەز دترسم ل ناڤ جهێن قەرەبالخ دا بەلێ سەرەرای هندێ بو من هەمی کەس وەکی ئێک ئاستن هەتا ئەگەر نێزیکێن من ژی بن، شیانێن من وەکی یێن تە نینن کو ئەز بشێم پەیوەندیێن زۆر دگەل خێزان و هەڤال و جڤاکی دروست بکەم و ئەز نەشێم یارییان بکەم چونکی دراستیدا من هەڤال نینن ژبەرکو هەر کەسەک هزردکەت کو ئەز دێ زیانێ گەهینمە ئەوان بەلێ ئەز هەر نزانم زیان چییە! ژبەرهندێ ئەز هەست بتنێ بوونێ و کێماسیێ دکەم و زۆر جاران حەزدکەم بتنێ بمینم بۆ ماوەیەکێ دیارکری و دگەل کەسێ گەنگەشێ نەکەم هەتا دبیت بگەهیتە ئاستێ هندێ کو ئەز خۆارنێ رەتبکەم و ئەڤەژی دبیتە ئەگەر کو گەلەک ئاریشەیێن دیتر ل دەڤ من دروست بکەت. هەروەسا بۆ من ژێک جوداکرنا رەنگان و شێوەییان و قەبارەییان گەلەک یا سەختە، و ئەز هەردەم تشتان بێ سەروبەر دکەم بەلێ ئەگەر تو ب چاڤێن من تەماشەی ئەوان بکەی دێ بینی کو هەر تشتەک یێ ل جهێ خۆ و یێ دروستە. بەلێ سەرەرای ئەڤێ هەمی جێوازیێ من دلەکێ پاقژ و جوان یێ هەی و سەروسیمایەکێ وەکی تە و ئەز خرابیێ ناگەهینمە تە، من حەشێکرن و ڤیان یا بۆ تە هەی ژبەرکو ئەز هەر نزانم نە ڤییان چییە!
ب چاڤەکێ نەشرین تەماشەی من نەکە بەلکی دەمێ ئەز خەلەتبم من راستڤەبکە و یا دروست نیشا من بدە دا کو ئەز ژی بشێم شەری دگەل ئەڤێ تێکچوونێ بکەم ژبەرهندێ ئەگەر تو ب دروستی ڕەفتارێ و سەرەدەریێ دگەل من نەکەی ئەڤ تێکچوونە دێ ل دەڤ من رۆژ بۆ رۆژێ زێدەتر لێ هێت و دێ کونترولێ ل سەر خۆ ژ دەست دەم و رەوشا من دێ بەرەڤ خرابیێ ڤە چیت، ئەڤجا دەستێ من بگرە و هەمی پێکولان بکە کو هاریکارییا من بکەی دا کو ئەز ژی بشێم وەک تەبم و خوشیێ ژ ژیانا خۆ وەربگرم دگەل تێکچوونا خۆ، و ئەز ب سەرکەڤم!.
نڤێسەر: دەروونناس شەڤین صباح