زوربەی کەسان لدیف حەز و خواستا خوە رەوشا سووریا شروڤەدکەن ، هندەکێن دیتر لدیف ئاراستە و بوچوونێن خوە شیکاردکەن .
لێ دراستیدا حەتا نوکە نەیا روون و ئاشکەرایە کا چییە روویددەت ؟ کێ چ دڤێت ؟ کی نە حەزدکەن سوریا دابەش بیت ؟ کی نە حەز دکەن سوریایەکا ئێکگرتی دروست ببیت؟ ل هندەك جهاندا هێشتا داخازا حکومەتا بەرێ دکەن و هندەکێن دیتر داخازا حکومەتا نوکە دکەن لێ دهەردوو رەوشاندا هێشتا دەنگێ تەقەیێ و رەڤاندن و گولەبارانکرن دهێتە گوهلێبوون .
شیعە دبێژن ئەڤ لڤێنێن هاتینە کرن و کەفتنا دەستهەلاتا بەشار ئەسەدی واتە نزیك بوونا ئسرائیل و ئەمریکا یە ژبو سوریا ، سونە دڤێ پرسێ دا بێدەنگن و هەلویستێن جوداهەنە ، کورد ژی دترسن ژ تورکیا چونکی جولانی گەلەکێ نزیکی تورکیایە و پەیوەندیێن باش دگەل وان هەنە و د رابردووی جولانی شەر ل دژی کوردان کرییە و دگەل رێکخراوێن تیروری و گرێدای ب تورکیاڤە گرێدای بوو .
پێنگاڤێن هەسەدێ ب رابەریا مەزلوم عەبدی دباشن چونکە ئەو باش دزانیت داردەستێن تورکان حەز ناکەن کورد بگەهنە ئارمانجێن خو ل هەر جهەکی ، مەزلوم عەبدی دوهی بو روژناما شرق الاوسط دا دیارکرن : کو یێ ئامادەیە هەمی سنوران رادەستی حکومەتا نوی یا سوریە بکەت ، دبیت ئارمانج ژڤێ گوتنێ ئەو بیت کو ئەو دزانیت دروستبوونا هەرێمەکا سەربەخو بزەحمەتە لێدێ پێکولا کەت مافێن کوردان بنەجهـ کەت د حکومەتا نوی یا سوریادا .
هەسەدە پێکولا دکەت هاولاتی و باژارێن کوردی بپارێزیت ژ داگیرکاریێن تورکا ، تورکیا ژی پێکولا دکەت داردەستێن خوە بهنێریتە دەوروبەرێن باژارێژ کوردا و ب بهانەیا هندێ باژارێن کوردی بوردومان بکەت ، لێ باشا دیارە تورکیا دترسیت هەرێمەکا دیتر یا کوردی دروست بیت لەوما دێ هەمی هەولا و بەهانەیا دەت روژئاڤایێ کوردستانێ نەبیتە هەرێمەکا سەربەخو .
پروژێ هەرێما سەربەخو پێتڤی ب ئێکگرتنەکا تەمامە لێ مخابنیڤە ئەم وێ ئێکگرتنێ نابینین ، پەکەکە و ئەنەکەسە ب دژی هەسەدێ یێ پێنگاڤێن خراب دهاڤێژن و ئەڤ پێنگاڤە دێ پتر رولێ تورکیا بهێز ئێخیت و ببیتە رێگر د دروستبوونا هەرێما سەربەخودا ، لەوما پێنگاڤێن هەسەدێ بەرەف هندێ ڤە چووین بچیتە دگەل حکومەتا نوی یا سوریا داکو مافێن کوردان بپارێزیت لشوینا بوردومانێن تورکا و کوشتنا کوردان لوان باژار و دەڤەران .
نڤیسەر: دیندار سەرگەلی