چیروکا ڤێ گوتنێ ل سەردەمێ کەڤن دزڤریت، ل دەمێ والی هەبوون، هەر وەک نوکە پارێزگار، لێ والی ب شێوەکێ بەرفرەهـ تر دەستهەلات هەبوون، ل وی دەمی ئێک ژ والیا، بێژە والیێ شامێ، کەفتبوو لەپێت خو و پارە ل ناڤ ویلایەتا وی گەلەک کێم ببوو. ئێنا رابی گازی شیرەتکارێت خو کر، و گوتێ مە پارە ل خەزینیێ نەماینە، و ئەم هوسا نەشێن ب دروستی کارێ خو بریڤە ببەین، ڤێجا هین دبێژن ئەم چ بکەین؟ ئینا والییا ژی گوت پێدڤییە ئەم باجا ژ هەمی کاسبکار و پیشکارێن وەلاتی وەرگرین، و ل سەر وان زێدە کەین. والیی ژی پسیار کر، ئەگەر ئەم وە بکەین، دێ چەند پارە ب دەست مەڤە هێن؟ وان ژی گوت دێ نیزیکی 50-60 کیسێت زێری ب دەستڤەئێن. وی دەمی ژی هەر کیسەکێ زێری هزار پارچەیێت زێری تێدا بوون. ڤێجا والیی ژی پاشی پسیار کر، ئەرێ ئەڤ پارەیێ هند مەزن، دێ دکاندار و کاسبکار و خودان پیشە ژ کیڤە ئینن؟ وانا ژی عەیال هەنە و ب تەعدایی دشێن خو خودان کەن. شیرەتکارا ژی گوت ئەگەر مە ئەڤ تشتە کرە ئەمر ئەو دێ بەردەست کەن خو هەکە خو و عەیالێ خو و خێزانا خو بفروشن.
پیچەک والی بێ دەنگ ما و پاشی گوت، ئەگەر ئەز پتر ژ ڤان پارا بینم هەوە چ رێکێت دی هەنە بێ کو باجا زێدە کەین؟ وانا ژی سەحدکرە ئێک و دوو و بێ دەنگ مان و پاشی گوتن زەحمەت چ رێکێت دی هەبیت. والیی ژی گوت هندە کومبوون ب دوماهیک هات، هین دشێن بچین.
دەمەک بووری و دونیا بی شەڤ و والی یێ هشیار، رابی پەیوەندی ب مفتی کر و گوتێ وەرە نک من، من شولەک ب تە هەیە. لێ هوسا وەرە کو کەس تە نەبینیت ب ئێک جاری، ئەڤ کارە گەلەک یا نهێنییە و کەس پێ نزانیت. رابی مفتی ژی نیڤەکا شەڤێ هیدی هیدی ل تارییاتیێ دچوو بەر ڤی دیواری و بەر وی دیواری حەتا خو گەهاندییە نک والی. والی ژی گوتێ ئەڤە چەندە تو یێ کارەکێ خراب دکەی، هندی من ژی خو بێ دەنگ کر و من گوت دێ باشتر لێ هێی تو هەر وەک خوت و تو یێ خراب تر دکەی. تو مفتی، بوچوونا تە ل هەمی ڤی وەلاتی جهێ رێزێ یە، خەلک ژی قەدری ل تە دگریت، تو چاوا دشیێ وە بکەی!؟ مفتی ژی گوت ما من چ کرییە والیێ من تە چ ل سەر من هەیە؟ والیی ژی گوتێ پشتی چەند روژەکا من کومبوونەک یا هەی دگەل ئەمیرێ وەلاتی هەمیێ، و من هندەک خال یێت دەست نیشان کرین دێ بو بەحس کەم، ئێک ژ وانا ژی بەحسی تەیە. دێ بێژمێ کو مفتی یێ مە حال و مەسەلێت وی ئەڤەنە و یێ خرابییا دکەت. مفتی ژی ل جهێ خو د هەژییا و ترسیا و کەتە بەر پێت والی و گوت: نە ئەزبەنی تو بخودێ وەنەکە و تە چ دڤێت دێ بو تە کەم. بەس نەبێژە ئەمیری. ئەز دێ ئێک کیسا زێری دەمە تە هەما بەس من عەفو کە. والی ژی گوتی ئەڤە چییە تە دڤێت تو بەرتیلا بدەیە من؟ وی ژی گوتێ نە ئەزبەنی ئەڤە هەر بو خیزانا دەولەتێ یە و بو خەلکی یە. والی ژی گوتێ ئەز دێ هەر ئەمیری پێ ئاگەهـ دار کەم و ناچێبیت ڤێجا. بر و ئینا حەتا گەهشتییە وێ رادەت کو مفتی گوتێ دێ دەهـ کیسێت زێری دمەە تە هەما بەس من عەفو کە و ئەز وەناکەم جارەکا دی. رابی والی ژی گوتێ بلا بەس دێ ئیمزا ژی کەی هەر جارەکا تو وەبکەی و دووبارە کەی دێ ب توندی هێیە سزادان. مفتی ژی گوتێ بلا، 10 کیشێت زێری دانێ و ئیمزا کر و چوو مالا خو ڤە.
والی ژی پشتی مفتی چووی هەر هەمان تشت کرە ڤە، و چوو گازی دادوەری کر. ڤێجارێ گوتێ شولێ تە ژ یێ من و یێ ئەمیری گرنگ ترە، ئەو تو چارا بەرتیلا وەردگری؟ جارەکا دی دادوەر ژی کەتە لەپێت خو و کەتە بەر پێت والی و گوتێ ئەز بەنی تە چ دڤێت دێ بو تە کەم بەس من عەفو کە و ئەز دووبارە ناکەم. ڤێ جارێ ژی نیزیکی 6-7 کیسێت زێری دانانا وێرێ و ئیمزا کر و چوو.
ئەو شەڤ خلاس نەبی حەتا والیێ مە ئەڤە دگەل تژی وێرێ سەرمەزن و کەنکەنە و بەرپرس و حەفک ستیر و بازرگانێت ویلایەتێ هەمیێ نەکر. حەتا بی سحار ڤە. رابی چوو جارەکا دی گازی شیرەتکارێت خو کر، و گوتێ من پارە ب دەست ڤە ئینان بێ زێدە کرنا چ باجا، هین هزر دکەن من چەند کوم کربن؟ گوتنێ والله هەکە باج ل سەر هەمی ویلایەتێ 50-60 کیسا زێدەتر نائینیت، تە چەند و چاوا کوم کر بن تو نیڤەکا هندێ ژی د شەڤەکێ دا کوم ناکەی! وی ژی گوتە وانا من 250 کیسێت زێری کوم کرن!! هەمی بێ دەنگ مان و پاشی گوتن ئەو چاوا ئەزبەنی تە ئەڤ پارە هەمی ژ کیڤە ئینان. ئینا رابی گوتنا خو گوت:
بڕینا هرییا بەرانا گەلەک چێترە ژ کەڤلکرنا حەیوانا!!!
هەمی ژی ل جهێ خو تێگەهشتن!!
ئانکو برێنا هریێ یێ کو زێدە ل سەر لەشێ گیانەوەرێن قەلەو و ب هری گەلەک باشترە ژ کەڤلکرن و راکرنا ئەو پیچە چەرمێ مای بو هندەک گیانەوەرێن دی.
نڤیسەر: احمد مصطفى
ژێدەر: وار تیڤی