"لا تحزن" (ئانکو "خەمگین نەبە") پەرتووکەکا خۆپاراستن و پالدەرە کو ژ لایێ زانایێ سعودی دکتۆر عائیض کوڕی عەبدوڵڵا القرنی هاتییە نڤیسین. ئەڤ پەرتووکە ڕێنمایێن ڕۆحی و ئامۆژگاریێن پراکتیکی پێشکێش دکەت دەربارەی چەوانیا سەرەدەریکرن دگەل هەڤرکیێن ژیانێ و خەم و فشارێن ژیانێ ب مفا وەرگرتن ژ فێرکاریێن قورئان و فەرموودەیێ.
ئەوا چووی چوو!
دڤێ برگێدا نڤیسەر داخواز ژ خواندەڤانی دکەت کو گەلەك مژویلی رابردووی نەبیت، چونکی هزرکرنا زێدە لسەر رابردووی هیچ تشتەکی ناگوهوریت. ژبەر هندێ یا پێدڤیە مروڤ خەمێن رابردووی بجه بهێلیت و یێ گەشبین بیت بۆ نوکە، هەولبدەت بنیاتەکێ باش بۆ پاشەروژێ بدانیت.
قەنجیکرن دگەل کەسێن دی دڵ ئارامیێ دبەخشیت!
هاریکاریکرنا کەسێن دی و قەنجیکرن دگەل وان دڵخۆشی و ئارامیا دەروونی دئینیت. دەمێ مرۆڤ پێدڤیەکێ بۆ کەسێن دیتر دابین دکەت، چ ب رێکا ئاخفتنەکا خۆش بیت یان بەخشینا ماددی، هەست ب ڕەزامەندیا ژناڤدا دکەت، ئەڤەژی ڕەنگڤەدانا ئەرێنی لسەر بارێ دەروونی دروست دکەت.
ب کاران ڤالاهیێ پڕبکە!
بێ کاری ئێك ژ مەترسیدارترین تشتە کو کاریگەریا نەرێنی لسەر ڕۆحێ دکەت و هەستێ دڵتەنگیێ زێدە دکەت. دەمێ مرۆڤ مژویلی کارێن ب مفا دبیت، مێشکی مژویل دکەت و ژ بیرئینانا خەمان دویردکەت. ژبەر هندێ نڤیسەر ئاموژگاریێ دکەت کو دەمێن ڤالا بهێنە پڕکرن ژ کارێن ب مفا و بەرهەمدار ژبۆ دویرکەفتن ژ نەئارامیا دەروونی.
ئەگەر ژییانێ لەیمون دانە تە، تو ئاڤا لەیمونا ژێ چێکە!
دڤێ برگێدا نڤیسەر بانگێشا خواندەڤانی دکەت بۆ گۆهوڕینا دوخێن سەخت و ململانەیێن کو د ژیانێدا ڕووبەڕوو دبیت ب شێوەیەکێ ئەرێنی. لەیمون هێمایێ نەخوشیانە و ئاڤا لەیمونێ دەربرینێ ژ گۆهوڕینا وان سەختییان دکەت بۆ دەرفەتا فێربوون و گەشەکرنێ.
بگڕنژە!
گڕنژین دەربڕینێ ژ گەشبینی و ڕازیبوونێ دکەت. دەمێ مڕوڤ دگڕنژیت، پەیامەکا ئەرێنی بۆ خۆ و کەسێن دەوروبەر دهنێریت. گڕنژینێ هێزا باشترکرنا بارێ دەروونی و بەلاڤکرنا دڵخۆشیێ هەیە، هەروەسا دەربرینە ژ زاڵبوونێ لسەر سەختیێن ژییانێ.
جیهان ب ڤی شێوەی یا دروستبووی!
جیهان پڕە ژ دژایەتی و دژوارییان، هەروەسا ئەڤ تشتە بەشەکێ سروشتیێ ژیانێیە. تاقیکرن و بەڵا و نەخۆشی بەشەکن ژ یاسایێت گەردوونی. نڤیسەر ئاماژێ ب هندێ ددەت کو ئەڤە سروشتێ جیهانێیە، و باشترە ب ئەڤێ ڕازیبین و ب شێوەیەکێ ئەرێنی دگەڵدا بژین. ئاڕمانج ژ ڤێ برگێ هاندانە بۆ خواندەڤانی بۆ خۆگونجاندن دگەڵ بارودۆخێن سەخت و ب سەبر و ڕازیبوون ب سەردا زاڵ بین، چونکی جیهان بۆ هندێ دروست نەبوویە کو بێ کێشە بیت.
توڕە نەبە!
مڕوڤ ب توڕەییێ هەفسەنگیێ ژدەست ددەت، دبیت هندەك تشتا بکەت پەشێمان ببیت یان هندەك ئاخفتنا بێژیت و پەشێمان ببیت ئەڤجا یا گرنگە فێربی دێ چەوا کونترولێ لسەر توڕەبوونا خۆ کەی، توڕەبوون ئاگرە و ب ئاڤێ دهێتە ڤەمراندن، ئەڤجا یا گرنگە لدەمێ توڕەبوونێ ئاڤێ ل سەر و چاڤێت خۆ بکەی و جهێ خۆ بگهوری ئەگەر دشیاندا بیت، و بێدەنگبە لدەمێ توڕەییدا.
زانین ڕێنیشاندەر و شیفایە!
ئێك ژ مفایێن زانینێ نەهێلانا دوودلیێ لسەر نەفسێیە و نەهێلانا خەم و دڵ تەنگیانە. یا پێدڤیە لسەر مڕوڤی دەمەکی تەرخان بکەت بۆ لێگەریانا زانینێ و ژبەرکرن و خواندنێ.
ژیان هەمی ماندیبوونە!
هەمی خۆشیێن دونیایێ خۆشیێن دەمکی نە، ئەگەر دونیا هەمی خۆشی با نەساخی و بەڵا نەدبوون. پێغەمبەرێ مە (سلاڤ لێ بن) دبێژیت " دونیا زیندانا باوەردارییە و بەهشتا بێ باوەرانە".
نیگەرانی هیچ مفای نا گەهینیتە تە!
نیگەران نەبە و ژ وێ رازیبە یا خۆدێ بۆتە هەلبژارتی، نیگەرانی بتنێ ئاریشەیان دروست دکەت و دەروونی تێکددەت، پشت بەستبە ب خۆدێ و بلا تۆ یێ گەشبینبی.
ئاگرێ دوژمنایەتیێ بڤەمرینە بەری بسوژیت!
دڤێ برگێدا نڤیسەر گرنگیا چارەسەرکرنا ناکوکی و دووبەرەکیێ ددەتە دیارکرن بەری کو ئاریشە و هەڤڕکی ئالوزتر لێ بهێت، هەولبدە لێك تێگەهشتن و ئاشتیێ پەیدابکەی.
و ل دوماهیێ بۆ من دەرئەنجامەك دیاربوو پشتی خواندنا ڤێ پەرتووکێ، بەختەوەری ب کویراتی یا گرێدایە ب باوەری و پشت بەستنا مرۆڤی ب خودێڤە. پەیاما سەرەکی ئەوە کو سەرەڕای تاقیکرنێن ژیانێ، پاراستنا هەڵویستێ ئەرێنی و پشتبەستن ب ئیمانێ دشێت ببیتە هۆیێ ڕازیبوونا ڕاستەقینە.
نڤیسەر: هێما کامیران
ژێدەر: لا تحزن (د.عائض القرني)