ل ئێڤارەکا وەرزێ پایزێ، ڕۆژا شەمبی بوو یا کۆ من پلان کری ئەز وێ ڕوژێ بچمە بازاری و پێداویستیێن خۆ بکرم ...
من ژی کراسێ خۆ یێ قەهوائی یێ وەك بەلگێن هشك لبەر خۆ کر، و پاتەکێ کەسکێ تاڕی لدور پرچا خۆ ئالاند و بەرەڤ دەرگەهی چوم، من ئەو پێلاڤە کرە پێن خۆ یا کۆ دگەل کڕاسێ من نە گونجیت بتنێ چونکی ئارامیێ ب من ددەت ! .
و ئەز چوم تاکۆ گەهشتیمە جادا سەرەکی، براستی ژ دەمێ ئەز پێخۆ ژ دەرگەهێ ماڵ دهاڤێژم، دگەل خۆ ئاخفتن لدەف من دەستپێدکەت ! هەر تشت، هزرا هەر تشتی دکەم یێ د هێتە بەرچاڤێن من هەتا کۆ د زڤرمە ماڵ ڤە ...
دەمێ کۆ ئەز گەهشتیمە جادا سەرەکی و لهیڤییا پاسێ ماییم...
من گوت: هەردەمێ ئەز لهیڤییا پاسێ دمینیم دخوازم زوی بهێت، لێ ئەڤجارە نە! من دڤێت پیچەک گیروو ببیت، ژبەر کۆ ئەڤ دارێن بەلگێن خۆ بسەر من دا دبارینن روحێ ل من ڤەدژینن !
هێش من بتەمامی وەنە گوتی پاسە هاتە بەرسینگێ من! ئەز لپشت خۆ زڤریم کەسەکێ دی ژبلی من لهیڤیا وێ نینە، پاشان ئەز ب هێدی چومە تێدا..
پاسە یا تژی بوو بتنێ دوو جهێن ڤالا مابوون، ئەز ژی لنک زاروکەکێ یا روینشتبووم...
من بەرێخودا پەنجەرێ ، زەلامەک ژ دوورڤە یێ دەستێ خۆ بۆ پاسێ بلند دکەت و دبەزیت، هوسان یێ بلند کەت دێ بێژی بهاترین تشتێ وی یێ ب ئەڤێ چەندێ ڤە گرێداییە!
پشتی کۆ ئەم نێزیکی وی بوین دوو زەلامان گوتە شوفێری...هشیاربە، بۆ نە ڕاوستە ئەو کەسە یێ دینە ! ..
و هوسا شوفێر چۆ، من بەرێ خۆ دا زەلامی کا چەوا ب دویف پاسێ دهات و هەر وەکی یێ دبێژیت هێ هێ راوەستن هەوە رێزدارەک ژبیرکر !
پشتی کۆ شوفێری کورسیێن خۆ تمامکرین، بلەزتر دا ڕێ،
و ئەڤ چەندا هەنێ وەکی هەرجار تڕسا توشبوونا بڕویدانەکا تڕومبێلێ سەرێ من د گەڤزاند!
پاشی من خۆ ژبیرڤە بر ...
ئەرێ بوچی هندەک کەس هەنە ب چونا دناڤا پاسێ دا دلگران دبن ؟!
من ژ خۆ پرسی.
نە کۆ ژبەر پارەی ئەز پاسێ د هەلبژێرم بۆ چوونا بازاری بەلێ ..پا.. دەمێ ئەز مڕوڤێن جودا جودا دبینم هەر وەک ئەز یا تەڤایا جڤاکی د پاسەکێ دا مێزە دکەم !
ل لایەکێ دوو ژن یێن باسی کەلوپەلێن باش یێن ناڤماڵێ دکەن، و ل رەخەکێ دێ زەلامەكێ دیندار و خودان سەربور یێ ئاموژگاریا ل گەنج و یێن دەوروبەرێن خۆ دکەت، ل قۆلاچەکا دی دانعەمرکێ بتنێ، دەستێن خۆ یێن داناینە سەڕ گوپالێ خۆ و سەرێ خۆ یێ بەر ب خەمێن خۆ ڤە خوار کری..
هندەک ژی یێن د هاڤێنە سیاسەتمەداران و ئابورێ وەلاتێ خۆ ب وەلاتێن پێشکەفتی هەڤبەردکەن !
"هەر چ بیت یێ د پاسێ دا هەی، پاس مینا ڕوژنامەیەکێ یە دەنگێ مڕوڤان ب ئێك د گەهینیت ..! "
بەلێ و دبیت بۆ تە یا سەیر بیت کەسەکا وەک من گوشەگیر حەز ژ پاسا تژی مڕوڤ بکەت!
کۆ تێدا وەکی گەشتیارەکێ بێدەنگ دبیت، و بتنێ تەماشەی دەوروبەرێن خۆ دکەت و خۆشیێ پێدبەت.
ئەو زاروکێ برەخ من ڤە ژی ئەڤە دوو جارە دلێ وی رادبیت! نەکۆ دوماهیێ کڕاسێ من پیس بکەت !
پاشی چاڤێن من ب کۆلاڤێ کەسەکی کەفتن، من تەماشەی سەروبەری وی کر، دیار بۆ کۆ ئەڤە نە سەروبەرێ چینا هەژارانە، تەنانەت وەکی یێ چینا ناڤنجییا ژی نینە!
من گوت ئەرێ ئەڤ کەسێ هوسا لێکدای دڤێرێ دا چێدکەت ؟ یان ژی ئەوی بتنێ دڤێت ب ڤی جورێ جلکێ رێکو پێک، خەلک وی ب رەوشەنبیر ب دانن ! وەکی گەلەک ئەڤێ چەندێ دکەن، یان ... یان ژی ئەو ژی وەکی من حەز ژ پاسێ دکەت !
من د ئاخفت و دەنگێ هوڕێنێن تڕومبێلەکێ هاتن، شوفێرێ پاسێ ژی شەپرزەبوو و ب خوار و ڤیچ چوو.
من ... من ئێکسەر چاڤێن خۆ گرتن و من گوت یا خۆدا یا خۆدا دوماهیك ....
دەنگێ تڕومبێلێ راوەستا و من هوو چاڤێن خۆ ڤەکرن، کراسێ من هەموو یێ پیس بووی، دیسا دلێ ئەوی زاروکی راببو !
من هەناسەیەک کێشا و گوت یا خودێ.. یا خودێ ئەڤ جارە ژی نە دویماهیک بوو! .
نڤیسەر: وجدان فیصل