ئەز نزانم چ بكەم! ئێدی گەلەگ یا دترسم، هەر تشت یێ بەرەڤ نەمانێ ڤەدچیت. ئەڤرو ئەو دوماهیك گولا دناڤ قولاچكا باخچەی ژی دا مای، هشك بوو. هزرێن من ئێك ل دیف ئێك، خو دناڤ مێشكێ من دا رێز دكەن، هندەك ژوان ژی پێكولا دكەن، رێزێ و یاسایێ تێكبدەن و خو بەر هەڤالا خورا بكەن و بەری وان بگەهنە خانا ئەنجامدانێ و ب راستی ژی هزرەكێ وە كر و بەری هەمیا خو ئینا پێش. ئەو بوو، كو من ب جوانی و باشی چاڤدانا باخچەی نە كریە. بەلێ هزرەكا دی دەستێ خو بلند كر و ل پشتا هەڤالا خودا و وێڤەتر هاڤێت و هوسا هات كو چێدبیت كەسەكی ماددەك دناڤ باخچەیی وەركربیت. ژبەر ڤی ئەگەری هەمی باخچە یێ هشك بوی، بەلێ رەشەبایەکێ راستیا ھات و هزر هەمی دگەل خو برن. راستی ئەو بوو كو نە بتنێ باخچێ مە، بەلكو باخچێن جیرانێن مەژی، یێن هشك بۆین و گەلەك جاران گیا و داروبارێن ل سەر لێڤێن جادان ژی دبینم، ئەو ژی یێن هشك بۆین. نزانم، ئەڤە نەخوشییە یان نەفرەتە؟! من دوماهیك نێرین د پەنجەرا ژورا خودا ل باخچەیی و ماڵین دەوروبەرێن مە كر، چاڤ و لەشێ خو من بەرەڤ جهێ روینشتنا خو برن،
ل بەرانبەر لاپتوپی روینشتم و من پسیار ل دویف پسیارێ ژ گوگلی و ژیریا دەستكرد كرن.
ئەگەرێ هشكبوونا گولان چیە؟
ئەگەرێ نەمانا داران چیە؟!
هەر جارەكێ ب دەهان بەرسڤ بۆ من هێلان. وك نەخوشی، تێكچوونا سەقایی، ئاتافێن داروباری .... هتد.
لێ ڤان ئەگەران ئەز رازی نەكرم، چونكی ئەڤە چەندین سالە هەر ئەو ئاخە و هەر ئەو سەقایە یێ ئەڤ باژێرە و بونەوەرێن ڤی باژێری فێربوینێ.
ـ پا ئەگەر چیە؟
ئەرێ چ زانا یان كەسەك نینە، ڤێ ئالوزیا بێ چارەسەری، دەرگەھەكی لبەر ڤەكەت!
رۆژ بۆ رۆژێ ئەڤ بابەتە ل سەر تیڤی و پوستێن پلاتفورمێن جوراو جور هاتنە دیتن. ئێدی گەلەك یا مەترسیدار دبیت، ل هەمی جهێن ڤی باژێری، ل چیا و دەشت و دولێن وێ كەسكاتی یێ بەرەف نەمانێ د چن. بدرێژاهیا ژیێ خو من یا ئاگەھ ژ نەمان و ژ ناڤچوونا گیانەوەران بۆی، ئەو ژی هندەك جورێن وان، بەلێ نەمانا هەمی جورێن كەسكاتی و داران، ئەڤە كارەساتە و من دگەل خو گوت: ئەرێ دبیت مە خوداوەندا سروشتی و گژوگیایی (دیمیتر) تورە كربیت! وێژی پیتێنا ئەردی ل مە حەرام كربیت، بەلێ بتنێ ل سەر دەمێن كەڤن باس ل ڤی تشتی دهاتەكرنێ. ئەڤە ژی تشتەكێ نە باوەرپێ كریە.
ئێدی ئەڤ بویەرە ببو ئاگر و باژێر هەمی د سۆت، ل سپێدەهیەكا خۆناڤ گرتی كو كێم بونەوەر ل باژێری دهاتنە دیتن، من بریاردا بچمە ناڤ جاددە یان هەر جهەكێ دی یێ باژێری، دا پسیار ژ هەر رۆەكەكی یان دارەكێ بكەم، كو هێشتا یا ل سەر خو و لاواز نەبوی، بەلكی ئەو بخو دەردێ خو بۆ من بێژن. دەمێ دناڤ جادادان د چووم، گولێن جوان هەمی یێن درێژ بوینە سەر ئاخێ، بتنێ یێ لهیڤیا بایەكی یان كەسەكی وان بۆ هەتا هەتایێ ڤەشێریت. رۆندكێن دلێ من، ژ رۆندكێن چاڤێن من زویتر د هاتنە خار، هوسا ئەم ژی دێ بەرەف نەمانێ ڤە چین. دوان جادان، دا من ئێك كەسكاتی نەدیت دا پسیار ژێ بكەم، ئەز نەچار بووم بەرەڤ دەرڤەیی باژێری بچم، لوێرێ ژی ب سەر چیایێن بلند بكەڤم، پشتی لەشێ من هەتاڤ مێشتی و خوھ ژ خو ڤالاكری و گەلەك ماندی بۆیم، من چار دار دیتن، هێشتا بەلگێن هندەك ژ وان ب خەملن و سەرێن خو یێن پێكڤە ناین. مەندەهوش بووم ب دیتن و مانا وان. نێزیك بووم، دبێ دەنگ بوون، پاشان ئێك ژوان لمن زڤری و گوت: ئەڤە چەندە، مە هەر چاران رهێن خو یێن تێك ئالاندین، دا هێزا خو ل سەر ئێك بەلاڤكەین و وەكی هەڤالێن خو نە مرین، لێ وەسا دیارە تو یا هاتی تاوانا خو بكەی، دا ئەم ژی بەرەڤ نەمانا درندایەتیا وە بچین. بۆ چەندەكێ سەرێ من هاتە تێكشێلان و سەرۆكانیا وێ شێلی بوو، ئەڤە باس ل چ تاوان دكەن؟
راوستیام، تا سەروكانی زەلال بۆی من پسیار ژ وان كر: مە یان من چ تاوان كرینە، هەتا هین هوسا ژ مە ب ترسن؟ من موبایلا خو ژ بەریكا خو هەلكێشا و من ڤیا وان وێنە بكەم و دەنگێ وان یێ خەمگین تومار بكەم، دا من بەلگە هەبن ل دەڤ خەلكی و دا ئاریشێ ژی ب زانن ، ل دەستپێكێ داران خو نەرازی كر، بەلێ پاشی ئێك ژ وان گوت: دوماهیكا مە هەر ژ ناڤچوونە، ئەڤجا بلا پەیڤێن مە ببنە دیدەڤانێن ژناڤچوونا مە و هوسا ڤەگێرا:
ل بەر چاڤێن هندەك دارا، برایی بۆ پارچەكا ئەردی برا كوشت و ئەو خوها ژ لەشێ وان كەتیە سەر ئەردی، هند كەرب و نەڤیان تێدا بوو رهێن وێ هشك كرن. بابی ل سەر ئاخا ڤی باژێری، دەستدرێژی كرە سەر كچا خو و خینا كچینیا وێ هند خەم و ئێشان تێدا بوو، لناڤ ڤێ ئاخێ بەلاڤ بوو. لڤی باژێری، رێژەكا گەلەك مەزن یا سپێرمێن كریارێن حەرامیێ كەتە ناڤ ڤێ ئاخێ! ئەڤجا ئەڤ ئاخە هند بێ پیت و بەرهەم بوو، كانزا و هەر مادەكێ ب مفا د ناڤدا هاتە سوتن و بوونە خۆلی، ئێدی چ ل سەر ڤێ ئاخێ شین نابیت. چنەمایە هێزا مەژی دێ ڤەمریت، پاشان بونەوەرێن ب مەژی دژین نا مینن و دویڤ دا مرۆڤ ژی دێ ژ ناڤچن!
چەند چركەكا پشتی گوھلێبونا ڤان ئازاران، خورافاتەكا دی خو ل سەرێ مندا ،ئەرێ دبیت دەمێ خوداوەندا ڤیانێ (ئەفرودیت)ا ژ ناڤچوی، ڤیان و عەشق ژی دگەل خو ژ ناڤ بربن و كەرب ل جهێ ڤیانێ بەلاڤ بویە؟
ئەوان جارەكا دی سەرێن خو پێكڤەنان و رۆندكێن وان هەلم ژ لەشێ وان بلند دكر، چونكی ژ ناڤدا دهاتنە سوتن. من ژی رێكا خو گرت و چوم د مالدا مام و چاڤەرێی ژ ناڤچوونێ بووم. خودا، دێ تولا هەر بوونەوەرەكی و هەتا تولا كریارێن مە مرۆڤا ژی ژ مە ڤەكەت و ئەڤە دادپەروەریە.
نڤیسەر: رێزان جەعفەر