پلان دانان ئەوە تو پێنوسێ خۆ بدانی و دەست ب کارێ خۆ بکەی. نموونا پلان دانانێ هەر وەکی نموونا ب کارئینانا GPSیە، دەمێ بکاردئینی یا پێدڤیە بزانی تو نوکە ل کیڤەی و پاشی بزانی تە دڤێت بچیە کیڤە، ل دویڤ دا دێ بوتە رێکەك یان چەندین رێك هێنە دەستنیشانکرن دا بزانی دێ چەوا گەهی و هەروەسا دێ بۆتە دەمی ژی دەستنیشان کەت بۆ هەر رێکەکێ، و لدوماهیێ دێ نیشانەکێ بۆتە دانیت دا بزانی تو گەهشتی.
ئەڤجا پلان دانان ژی بەرسڤا ئەڤان هەر چوار پسیارانە:
- تو ل کیڤەی: یا پێدڤیە راپورتەکێ لسەر خۆ بنڤیسی دەربارەی نوکەیا خۆ
- تە دڤێت بچیە کیڤە: دبێژنە ڤێ ئارمانج، ئەوژی یا پێدڤیە بهێتە نڤیسین، بەلێ ئارمانج پێدڤیە دروهن و ئاشکەرا بن و دشیان دا بن و هەروەسا یا پێدڤیە مروڤ وەك دل پێڤە بهێتە گرێدان
- دێ چەوا گەهی: ئەڤەیە پلان دانان کا دێ چەوا گەهیە ئارمانجا خۆ و یا پێدڤیە هەمی پێدڤیاتی بهێنە دەستنیشانکرن و ئاستەنگ ژی بهێنە دەستنیشانکرن و هەروەسا پلان B و C ژی بهێنە دانان ئەگەر پلان A سەرنەگرت
- دێ چەوا زانی تو گەهشتیە ئارمانجا خۆ: بخۆ کێمترین رێژا سەرکەفتنێ دەستنیشانبکە، ٦٠ ژ سەدێ ژی ئەنجامەکێ باشە
ئەرێ زانستێ پلان دانانێ زانستەکێ روژئاڤاییە؟
قورئانا پیروز یا هاتی دا کو باشترین نموونێ مروڤی بەرهەمبینیت هەروەکی خۆدایێ مەزن گوتی "إِنّ هَذَا الْقُرْآنَ يِهْدِي لِلّتِي هِيَ أَقْوَمُ" سورة الإسراء، آية ٩. زانستێ پلان دانانێ د گەلەك نموونێن قورئانا پیروزدا دیاردبیت هەروەکی نموونا موسا پێغەمبەر (سلاڤێت خۆدێ لسەر بن) دەمێ دچیتە دەف فیرعەونی داکو پەیاما خۆدایێ مەزن بگەهینیت، هەروەسا نموونا پلانا ١٥ سالی یا مسرێ ل سەر دەمێ یوسف پێغەمبەری (سلاڤێت خۆدێ لسەر بن) دەمێ هشکاتی بسەر واندا هاتی، و چەندین نموونێن دی ژی.
ئەرێ باشترین ئارمانج چیە؟
ئارمانجا سەرەکی رازیبوونا خۆدێ یە و سەرکەفتنا پشتی دونیایێ یە، و ئەڤەژی یا گرێدایە ب خزمەتکرنا کەسێن دیڤە، ئانکو تو بتنێ بۆ خۆ نەکەی بەلێ بۆ کەسێن دی ژی خزمەتێ بکەی، ژبەر هندێ یا پێدڤیە ئارمانجێن تە مفایێ تە و هەمی کەسان تێدا بیت.
داکو بشێی خزمەتا کەسێن دی بکەی یا پێدڤیە تو بخۆ یێ ئاڤابی یان ژی خۆ ئاڤا بکەی.
دێ چەوا زانی تو یێ بەرەڤ ئارمانجا خۆڤە دچی؟
پیڤەرێ مە ئەوە تو سەحکەیە روژانێت خۆ، ئەگەر پتریا وان کارێت تو پێ رادبی ئەوبن یێن تە نێزیکی ئارمانجا تە بکەن، ل وی دەمی تویێ لدویڤ ئارمانجا خۆ دچی.
چەوا پلانا خۆ بدانم؟
دەستپێکێ ئەم پێدڤی دەمی و هەروەسا شیاناینە. مە چوار جورێن شیانان هەنە:
- شیانێن روحی(ئیمانی)
- شیانێن ژیری(مێشکی)
- شیانێن دەروونی
- شیانێن جەستەیی
دبێژنە ڤان لایەنێن کەسایەتیا مروڤی، پلانێ بۆ هەر چوار لایەنان بدانە و هەفسەنگیێ بێخە دناڤ وان دا. ئەڤ شیانە دهێنە ڤەگوهاستن و دبنە ئەو رول ئەوێن ئەم پێ رادبین:
- رولێ خێزانی
- رولێ جڤاکی
- رولێ پیشەیی
- رولێ دارایی
دڤێت بخۆ دیتنەکێ بدانی و هەمیێ بنڤیسی، یا باشتر ئەوە پلانا ستراتیجی هەبیت ئانکو پلان بۆ ماوەیەکێ درێژ کو چەند سالن، دیتنا خۆ بۆ پاشەروژا خۆ بنڤیسە و پاشی پلانەکێ بدانە و پشکا هەر سالەکێ و هەر هەیڤەکێ ژناڤ بینە دەر و بنڤیسە و یا پێدڤیە پلانا حەفتیانە هەبیت ب بەردەوامی.
- دەمێ تو دیتنا خۆ دنڤیسی ب زمانێ ئایندەی نە نڤێسە بەلکو ب زمانێ نهو بنڤیسە.
رێکارێن خۆ بۆ ئارمانجا هەر حەفتیەکێ و هەیڤەکێ و سالەکێ بنڤیسە، یا پێدڤیە بەروار ژی بهێتە نڤیسین یا دەستپێکێ ژی و هەروەسا ئەو بەروارا تە بخۆ دەستنیشانکری کو تێدا بگەهیە ئارمانجا خۆ.
گرنگترین یەکا پلان دانانێ حەفتیە، یا گرنگە ل دوماهیا هەر حەفتیەکێ پێداچوونێ د کارێن خۆ یێن حەفتیێ دا بکەی بزانە تە کیژ کار نە کریە و پاشی ئێکسەر پسیارێ ژخۆ بکە بۆچی تە نەکر، ئەو چ ئەگەر بوون وەلتەکری تو ب کارێ خۆ نە رابی، و پاشی ئێکسەر وان ئەگەران بنڤیسە، هەولبدە دووبارە نەکەی و چارەسەربکەی.
یا پێدڤیە هندەك دەمژمێران بخۆ بدانی بۆ دەرکەتن و مێهڤانداری و گەشت و سەیرانان و بۆ هەر تشتەکێ نە چاڤەرێکری.
خشتێن هەیڤانە و روژانە یێن پلانان ل سەر ڤی لینکی ب دەست خوڤە بینە:
خشتێن پلانا هەیڤانە و روژانە
و لدوماهیێ ئەگەر ئەنجامێن پلانێن تە بتنێ ٦٠ ژ سەدێ بوون، ئەڤە سەرکەفتنەکا ئێکجار مەزنە ب بەراورد دگەل کەسەکی هەر پلان نەبیت و هزر تێدا نە کربیت و ژیانا وی یا بەرەلابیت. ئەڤجا ئەگەر تو کەسەك بی و حەزبکەی تو ژوان کەسێن رێبەر و سەرکەفتی بی، دەستپێبکە ب پلانا رێڤەبرنا ژیانا خۆ.