د. عەلی شەریعەتی دئەڤێ پەرتووکێدا رەوشەنبیرێن رەسەن و رەوشەنبیرێن چاڤلێکەر ژێك جودادکەت و ڕولێ رەوشەنبیران ددەتە دیارکرن و هەروەسا پێناسەیا رەوشەنبیران بەرچاڤدکەت و نیشا مە ددەت کا رەوشەنبیر کیە و یا پێدڤیە یێ چەوابیت.
د. عەلی شەریعەتی دبێژیت "هەر کەسەکێ هشمەندبیت و بشێت ب هشمەندی و هزر و تێگەهێ خۆ ل سەر هەمی ئارەزویێن خۆ یێن دیتر د جڤاکی دا ب سەر بێخیت ئەو رەوشەنبیرە."
دئەڤی پەرتووکێدا هاتیە دیارکرن کو تەخا رەوشەنبیران ل سەدێ هەڤدێ ل ئەوروپا دەرکەفت بدژی ئایینێ کریستیانی کو ئایینەك بوو دەستهەلات ل هەمی ئەوروپا دکر و ل وی دەمی ئەو ئایین دژی زانست و پێشکەفتنێ بوو، د. عەلی شەریعەتی گەلەك ژ نموونێن جوان ددەتە دیارکرن دەربارەی دژایەتیا ئایینێ کریستیانی بەرامبەر زانست و پێشڤەچوونی، دئەنجامدا ئەوروپا پێشکەفت و زانست ب دەست خۆ ئێخست، ئانکو ئەو رەوشەنبیرێن ئەوروپی رەوشەنبیرێن رەسەنن.
لێ وەلاتێن ئیسلامی رابوون ب چاڤلێکرنا رەوشەنبیرێن ئەوروپی و بدژی ئایینی راوەستیان، بەلێ پا ئەنجام دبەروڤاژی بوون چونکی ئایینێ ئیسلامی ئایینێ ئاشتی و پێشکەفتن و زانست و زانینێ بوو، ئەڤەژی بوو ئەگەرێ پاشڤەچوونا وەلاتێن ئیسلامی، ئانکو ئەڤە رەوشەنبیرێن چاڤلێکەرن.
د. عەلی شەریعەتی ددەتە دیارکرن کو پشتی هاتنا ئیسلامێ چەندەها نموونێن رەوشەنبیران هەبوون کو دجڤاکێ خۆ دگەهشتن و وەلاتێن ئیسلامی پێش ئێخستن ئەڤجا یا پێدڤی نەبوو رەوشەنبیرێن مە چاڤ ل رەوشەنبیرێن ئەوروپیان بکەن.
هەروەسا دبێژیت جڤاکێن مە و جڤاکێن ئەوروپیا گەلەك دجیاوازن، ئەڤجا یا پێدڤیە رەوشەنبیرێن مە دشارەزابن د جڤاکێن مەدا نەك یێن ئەوروپیدا. ئانکو ئەگەر سەرکەفتیترین رەوشەنبیرێ ئەوروپی بهێتە جڤاکێ مە دێ شکەستنێ ئینیت، و بەروڤاژی.
ئەڤجا ل سەر رەوشەنبیرێ جڤاکێ ئیسلامی پێدڤییە د ئیسلامێدا یێ زانا بیت. هەروەسا یا ژهەژیە بهێتە گوتن کو جەماوەر پێدڤی ب عاقلمەندیێ هەیە لێ رەوشەنبیرێ مە پێدڤی ب ئیمانێ یە.
د. عەلی شەریعەتی دبێژیت "بەرپرسییا رەوشەنبیران د سەردەمێ خۆدا پەیامبەرایەتییە د وی جڤاکیدا دەمێ پەیامبەر نەبن." ئانکو رەوشەنبیر هاڤتایێن پەیامبەرانە.
دکتور دبێژیت هەر پەیامەکا رەوشەنبیری دڤێت ل سەر ڤان بنچینان بهێتە دامەزراندن:
ئایین
مێژوو
شیانێن باش دئاخفتنا مرۆڤێ رەوشەنبیردا، دزارڤەکرنا ویدا و دهەلبەستێن ویدا.
ل دوماهیا ئەڤێ پەرتووکێ گوتارەك هاتیە نڤیسین کو یا تژیە ژ پسیاران و بەرسڤێن دکتور عەلی شەریعەتی.
نڤیسین و کورتکرن: هێما کامیران