بەشێ پولیسێن کۆمەڵگەیی بەشەکە سەر ب رێڤەبەریا پولیسێن پارێزگەها دهوکێ. جهێ وێ ژی ل سێمێلێ یە، نیزیک دادگەها سێمێلێ و خەستا دوبان. ئەرکێ سەرەکی یێ ڤێ بەشی ژی ئەوە کو وەک پرەک کاربکەت ناڤبەرا پولیسا و جڤاکی. ئێک ژ کارمەندێن ڤی بەشی دبێژت: پەیڤا پولیس ژ چ هاتییە؟ زەلامەک یان ئافرەتەک ب ڕەوشت، گوهدار، ب فەهم و پێزانین، تێگەهشتی، و خاندەڤان بیت.
ل ساڵا 2009 رێڤەبەریا پولیسێن کۆمەڵگەیی ل هەولێرێ هاتە ڤەکرن. دگەل هندەک نڤیسینگەهێن گرێدای ب هندێ ل گەلەک دەڤەر و پارێزگەها، وەک سلێمانی، دهۆک، گەرمیان، سۆران، و هندەک جهێن دی. ئەڤ رێڤەبەرییە سەر ب وەزارەتا ناڤخۆ یە. و ل ساڵا 2012، نڤیسینگەهێن بەربەلاڤ ل سەرانسەری هەرێما کوردستانێ بوونە بەش. ل ساڵا 2013، بەشێ پولیسێن کۆمەڵگەیی ل دهۆکێ ب فەرمی دەست ب کارێ خۆ بوو.
بەشێ پولیسێن کۆمەڵگەیی ل دهۆکێ سێ هۆبە هەنە: رۆژهەلات، رۆژئاڤا، و ئامێدی. هەر وەسا ئەڤ بەشە هێلەکا گەرم هەیە کو هەمی گاڤا یێ بەردەستە بۆ هاوولاتییان، ئەو ژی ئەڤەیە: 07502366364
هندەک ژ ئەرکێن ڤی بەشی ئەڤەنە: پرەکە ناڤبەرا پولیس و جڤاکی دا بۆ دروستکرنا پەیوەندییان ناڤبەرا پولیس و هاوولاتییان دا، ئەو ژی ب رێکا بەلاڤکرنا سمینارا، و بەلاڤکرنا رەوشەنبیریا یاسایی و جڤاکی بۆ هەمی تەخ و چینێن جڤاکی. هەر وەسا دروستکرنا پەیوەندییا ناڤبەرا پولیس وهەمی دامودەزگەهێن حکومی و میری، وەک هاتن وچوون، بەرگری و پێشمەرگە، و دامودەزگەیێن مەدەنی و بلدیات. هەر وەسا دروستکرنا پەیوەندییان ناڤبەرا پولیس و کەسایەتیێن رەوشەنبیر، ئاغا، ماقیل و فەقیرا.
- مەبەست ئەوە کو ببیتە هەڤالەکێ نیزیک دگەل هاوولاتییان و نەهێلانا ترسێ ل دەف هاوولاتییان ژ پولیسان.
ئەرکێن بەشێ پولیسێن کۆمەلگەیی
- جوانکرنا وێنەیێ پولیسا ل دەف هاوولاتییا کو پولیس کەسەکێ کۆمەڵایەتییە بۆ خزمەتکرنا خەلکی کار دکەت. پولیس کەسەکێ دەستپاک و راستگۆیە.
- هاندانا هاولاتییا کو ببنە کەسەک خۆبەخش بۆ چەسپاندنا ئاشتیێ.
- چارەسەرکرنا هندەک ئاریشا بەری کو بگەهنە بنگەهێن پولیسا.
- سڤککرنا کارێ بنگەهێن پولیسا.
- گرنگی دان ب ئاریشێن کۆمەڵایەتی.
- هەماهەنگییا تەمام و موکم دگەل بەشێ پولیسێن نەهێلانا تاوانان (مکافحە) و دگەل رێڤەبەریا توندوتیژیێ ل دهۆکێ و دگەل دیفچوونا کەیسا.
- تێگەهاندنا خەلکی کو ل سەر هاوولاتییە مو پشکداری دگەل پولیسان بکەت بۆ پاراستنا خۆ ژ تاوانێ.
- پولیس ب گشتی سیمبولا یاسایێ یە. دڤێت پولیسێ کۆمەڵگەیی یێ پێگێر بیت بۆ خۆشکرنا ژین و ژیانا هاوولاتییان و ئاگەهداری ئێش و ئازارێن جڤاکی بن.
- دڤێت پولیسێن کومەڵگەیی یێ نەرم بیت بۆ چارەسەرکرنا هندەک کێشا.
- کارێ پولیسێ کۆمەڵگەیی هەڤدیتنە دگەل هەمی هاوولاتییا.
- تێکەلبوون دگەل هاوولاتییا ژبۆ دەستنیشانکرنا پێدڤیێن تایبەت، بۆ نموونە، وەک ڤەکرنا هندەک خۆلان بۆ قوتابخانێن سەرەتایی وناوەندی.
- گهورینا شێوازێ کارێ پولیسا ژ کارگیری بۆ چارەسەریێ.
- چارەسەرکرنا کێشەیێن هاوولاتییان.
ئارمانجێن بەشێ پولیسێن کۆمەڵگەیی
- نیزیکبوونا هەڤالینی ناڤبەرا پولیس و هاوولاتییان دا.
- نەهێلانا ترسێ ل دەف هاوولاتییا.
- بهێزکرنا باوەریێ ناڤبەرا هاولاتی و پولیسا.
- نیاسینا پێدڤیێن هاولاتی.
- گرنگی دان کو ئاریشە نەگەهنە بنگەهێن پولیسا (ئانکو بەری هنگێ بهێنە چارەسەرکرن)
- سڤککرنا کارێ بنگەهێن پولیسا.
- دیفچوونا بابەتێن بازرگانیێ ب مرۆڤان و بەلاڤکرنا هوشیاریێ ل سەر هندێ.
دەرئەنجام
دبیت بەشێ پولیسێن کۆمەڵگەیی هند یێ بەرنیاس نەبیت د ناڤ خەلکی دا، لێ رۆلەکێ گەلەک گرنگ هەیە د بەلاڤکرنا هوشیاریێ دا و هاریکاریکرنا خەلکی کو کێشەیێن وان چارەسەر بن بەری مەزن تر لێ بهێن. ئەڤ پێزانینێن ل ڤێ گوتارێ نڤیسای ژ کارمەندەکێ ڤی بەشێ پولیسا هاتینە وەرگرتن. ب هیڤیا هندێ کو مفا گەهاندبیتە خواندەڤانی و سوپاس بۆ خاندنێ.
نڤیسین: احمد مصطفى