پێشەکیا پەرتووکێ: گەشتەکا ناخی ژ رەگان بۆ چقڵان
نڤیسەر ل دەستپێکێ دبێژیت کو ئەڤ بەرهەمە ئەنجامێ خواندنا پتر ژ 250 پەرتۆکانە و کارێ چوار سالێن تژی ئەزموون و تاقیکرنە. یاسر الحزيمي ب راشکاوی بەحس ل ژیانا خۆ دکەت و دبێژیت کو ئەو بخۆ یێ لاواز بوو، ژ تاریێ دترسیا و نەدشیا ل بەرامبەر خەلکی باخڤیت. ئەو دبێژیت: "ئەز ژ نەخۆشەکێ دناڵی، بوومە نوژدارەکێ چارەسەرکار". ئارمانجا وی ئەوە ڤێ ئەزموونێ ب زمانەکێ سادە بگەهینیتە هەمی تەخ و چینان، چ فەرمانبەر بیت، یان قوتابی، یان ژی دایک و باب.
پشکا ئێکێ: تێگەهشتن و زاراڤە (بنیاتێ کەسایەتیێ)
ئێک ژ گرنگترین خالێن پەرتووکێ جوداکرنا زاراڤەیێن دەروونی یە کو زۆربەیا خەلکی تێکەل دکەن. نڤیسەر کەسایەتیێ ب دارەکێ ددەتە نیاسین:
- قەدرێ خۆ گرتن (تقدير الذات): ئەڤە رەگێ دارێ یە. ئەگەر مرۆڤ ل ناخێ خۆ دا هەست ب کێماسیێ بکەت، هەمی تشتێن دی دێ لەرزی بن.
- باوەری ب خۆبوون (الثقة بالذات): ئەڤە قەبۆکا دارێ یە، کو هێزا مرۆڤی د کێشیت و دتەنگاڤیان دا نیشان ددەت.
- خۆ قەبوولکرن (تقبل الذات): مرۆڤ پێدڤیە ب باشی و کێماسیێن خۆ ڤە خۆ قەبوول بکەت و هەول بدەت خۆ پێش بێخیت.
- دووپاتکرنا خۆ (توكيد الذات): کو مرۆڤ بشێت ب راشکاوی دەربڕینێ ژ هەستێن خۆ بکەت و مافێ خۆ بپارێزیت.
پشکا دویێ: ئەگەرێن لاوازیا کەسایەتیێ
نڤیسەر باس ل هندێ دکەت کا بۆچی هندەک کەس هەست ب لاوازیێ دکەن:
- پەروەردەیا خەلەت: توندوتیژی یان پشتگوهئێخستن د زارۆکینیێ دا.
- بەراوردکرن: دەمێ مرۆڤ خۆ دگەل کەسێن دی بەراورد دکەت، هەست ب کێماسیێ دکەت.
- ترس ژ شکەستێ: ئەڤ ترسە ناهێلیت مرۆڤ هەنگاڤێن نوی پاڤێژیت.
پشکا سێیێ: رێکارێن چارەسەریێ (ئاڤاکرنا کەسایەتیێ)
ئەڤ پشکە مەزنترین پشکا پەرتۆکێ یە و گەلەک خالێن کریاری تێدا هەنە:
- پەیوەندی دگەل خودێ: نڤیسەر جەختێ ل سەر "حسنی الظن بالله" (گومانا باش ب خودێ برن) دکەت وەک بنیاتەکێ دەروونی.
- راستی و دەستپاکی (الصدق): مرۆڤێ راستگۆ خودان کەسایەتیەکا بهێزە چونکو تشتەکێ ڤەشارتی نینە ژێ بترسیت.
- سەرەدەری دگەل رەخنێ: فێربوونا هندێ کا چەوا بەرسینگێ وان کەسان بگرین کو ب مەرەما شکاندنێ رەخنێ ل مە دگرن.
- هونەرێ گۆتنا "نە": نڤیسەر رێنمایان ددەت کا چەوا ب رێزگرتن ڤە "نە" بێژینە وان تشتێن ل سەر حسابا مە و دەمێ مە دبن.
پشکا چارێ: لایەنێ شەرعی و ئایینی
نڤیسەر ب هوێری باس ل حوکمێ شەرعی یێ پەیڤا "باوەر ب خۆبوون" دکەت. ئەو فەتوایێن زانایێن وەک "ابن عثيمين" دئینیت کو دبێژیت: ئەگەر مەرەم پێ ئەوە بیت کو مرۆڤ یێ پشت راستە ژ کارێ خۆ یان ژ وی تشتێ دبێژیت، ئەڤە چ کێشە تێدا نینە و دگەل دوعایا "ولا تكلني إلى نفسي طرفة عين" ناگونجیت. مرۆڤ باوەریا وی ب وی هێز و عەقلی هەیە یێ خودێ دایێ.
پشکا پێنجێ: حالەتێن تایبەت
نڤیسەر چەندین نموونێن کریاری ددەت:
- ئاخفتن ل بەرامبەر جەماوەری: رێکارێن زانستی بۆ نەهێلانا ترسا ژ میمبەری.
- چاڤپێکەفتنا کاری (Interview): چەوا مرۆڤ خۆ نیشان بدەت و باوەریا خۆ دیار بکەت.
- ئیمامەتیا نڤێژێ: چارەسەریا ترسا هندەک کەسان دەمێ دبنە پێشنڤێژ.
پشکا شەشێ: بەرنامەیێ کریاری و رێنمایێن پەروەردەیی
د دوماهیا پەرتۆکێ دا، بەرنامەیەکێ روون هەیە بۆ هەر کەسەکێ بخوازیت کار ل سەر خۆ بکەت. هەروەسا پشکەکا تایبەت بۆ مامەلەکرن دگەل زارۆکان و هەرزەکاران (مراهقین) هەیە، داکو رێگری ل دروستبوونا کەسایەتیەکا لاواز بهێتە گرتن.
دووماهیك
پەرتۆکا "کەسایەتیا ب هێز" ب تنێ تیۆری نینە، بەلکو دەستپێشخەریەکە بۆ گوهۆڕینا ژیانێ. ئەو دبێژیت کو هێزا کەسایەتیێ نە ب دەنگێ بلند و ستەمکاریێ یە، بەلکو ب ئاشتیەکا ناخی و باوەریەکا بهێزە ب خودێ و ب وان توانایێن خودێ داینە مرۆڤی. ئەڤ پەرتۆکە رێبەرەکە بۆ هەر کەسەکێ دڤێت ب سەربلندی و بێ ترس بژیت.
نڤیسین و کورتکرن: هێما کامیران