گەلەک هزرێت خەلەت و بەربەلاڤ یێن هەین ل ناڤ جڤاکێ مە دا کو چ بنەما ژ راستیێ بو نینە، هندەک دبیت ژ هزرێن جڤاکی و کەلتوری یێن خەلەت، هندەک ژی شاشیێن هزرکرنێ، هندەک ژی بۆ بەرژەوەندیێن کەسوکی، هندەک ژی ژ خەلەتیێن هزری دهێنە چێکرن. دێ ل ڤێ گوتارێ بەحسی هندەک هزرێن خەلەت یێت بەربەلاڤ ل ناڤ جڤاکێ خو دا کەین.
1. ئەڤە هزارەهان سالە باب وباپیرێت مە میراتێ نادەنە ژنکا، ئەگەر ئەم نوکە بدەنێ ئەم دێ باب وباپیرێت خو کێم کەین. ژبەر هندێ ژی ئەم ژی نادەینێ.
ئەڤ ئاخفتنە چ بنەما بو نینە، نە ل یاسایێ و نە ل ئایینی ژی، تشتەکێ تشتەکە ژ دابونەریتێن جڤاکی یێن خەلەتن.
2. هەر ل دەمێ کەڤن وەرە هندەک گیا و رووەک وەک دەرمان بو هەمی نەساخییا دهاتە بکارئینان، بێ گومان ئەو گیایێت هوسا دشێن هەمی نەساخا ساخ کەنە ڤە.
ئەگەر ئەڤە یا درست با ئەم پێدڤی ب نوژدارا و زانستێن پزیشکی و دەرمانسازی و پەرستارا نابن.
3. ئەز بسلمانم، پێدڤییە ئەز دگەل ئیسلامێ و دژی عیلمانیەتێ بم، یان ژی ئەز دێ ژ ئیسلامێ دەرکەڤم (هەمێ بنەمایێن عیلمانیەتێ کرە د ئێک قالب دا).
عیلمانیەت گەلەک جور یێن هەین، و گەلەک رێک بۆ کرداری کرنە وێ هەیە، و گەلەک بنەما تێدا هەنە. هندەک جورێت عیلمانیەتێ ب ئاشکرایی دژایەتییا ئایینی دکەت، لێ هندەک یێت دی ب روونی پشتەڤانییا هەمی چالاکیێن ئایینی یێت کو دگەل بەرژەوەندییا جڤاکی بن. ژبەر هندێ هەمیێ نەکە د ئێک قالب دا و ب دەرکەفتنێ ژ ئیسلامێ گرێنەدە.
4. شێخێ عەشیرەتا مە یێ گوتی ئەڤ حزبە یێ باشە، ڤێجا بێ گومان دێ یێ باش بیت و ئەز دێ دەنگێ خو دەمێ.
ئاخفتنا شێخێ عەشیرەتێ هەمی گاڤا یێ درست نینە، پێدڤییە تاک بخو هزرا خو بکەت و بریارا دەنگدانێ بو بەرژەوەندییا وەلاتی بیت.
5. مەلایێ گوندێ مە یێ گوتی ئافرەت پێدڤی ب خاندنێ نینە، ژبەر هندێ ژی ئەز ناهێلم کچێت من بچن بخینن.
ئینانا هزرێت خەلەت و یێت نەگرێدای ب ئایینی ڤە و گرێدانا وان ب کەسایەتیێن ئایینی تشتەک خەلەتە، خاندنا ئافرەتێ ل ئیسلامێ بێ گومان تشتەک رێک پێ دایە و پشتەڤانی بۆ کرییە. ژبەر هندێ ژی ئەڤ ئاخفتنە درست نینە.
6. مانێ هەمی درەوا دکەن، ڤێجا هەما چنینە درستە ئەز ژی درەوا بکەم.
تنێ چونکی تشتەک یێ بەربەلاڤە و هەمی دکەن هندێ دیار ناکەت کو ئەڤ تشتە یێ درستە.
ل دوماهیکێ، گەلەک و گەلەک هزرێن خەلەت یێت دی یێت هەین ل ناڤ جڤاکێ مە دا، ئەڤە تنێ هندەک نموونە بوون، ئەگەر تە چ نموونەیێت دی هەبن بکە کومێنت. سوپاس بو تمامکرنا خاندنێ و هیڤیا مفایی.
نڤیسەر: احمد مصطفى