د دەرگەهێ تەنگ ڕا هەڕنە ژوور ! چنکو ئەو دەرگەهێ دچیتە وێرانکرنێ یێ بەرفرەهە و ڕێکا وی یا خۆشە و گەلەکن ئەوێن تێڕا دچنە ژوور ، لێ دەرگەهێ دچیتە ژیانا راستەقینە یێ تەنگە و ڕێکا وێ گەلەک یا ب زەحمەتە و کێمن ئەوێن ب سەرهلدبن .
مەتتا ٧:١٣
دماوەیێ خاندنا من بۆ دەروونناسییا کەسایەتیێ و گەشەکرنا وێ ، و ئەو ئالۆزی و نهێنی یێن لدەوروبەرێ بابەتا ؛ ئەو چ ڕێکا ژیانکرنێ یە کو دێ تە بەرەف گهوڕینەکا بلندتر ڤە دبەت و تە گەهینتە ئەو کەسێ کامل تر ژ زاتێ تە ، ب وێ ڕامانێ ئەو چ تێگەه و هزرەنە کو بەحسی ڕێکێن گهورینا مرۆڤەکی دکەن بۆ باشتر ، یان ئەڤە چاوا دهێتە بەحس کرن د دەروونناسیێ دا ؟
ب وێ ڕامانێ ، بەلکە ل وێرێ بوونەک هەبیت ژتە کو هێشتا نەهاتییە هەبوون . و ب گرتنە بەرا شێوازەکێ هزرکرنێ و رەفتارکرنێ یێ دیارکری ، دێ ئەو گهورانکاریێن بنەمایی د مرۆڤەکی دا ڕوویبدەن .
- Potential Self - ( زاتەک نخافتی )
پەیڤا پۆتێنشەڵ بۆ دەڕبرینا تشتەکی دهێت کو دنوکەدا بوونا خۆ نینە لێ ل داهاتیێ دێ پەیدابیت ، بوونەکا چاڤەڕێکری یە .
ئەڤە ژ لایەنێ زمانەوانی یێ پەیڤێ ، لێ د دەروونناسیێ دا ، تایبەت یا دەروونناسیا کارل یۆنگی دا ئەڤ دەستەواژە بکارهاتییە ، بۆ دەڕبرینەک ژ ئەو زاتێ ژتە یێ کاملتر و بلندتر ، کو ددەمێ نوکەدا تو نە ئەوی ، لێ هەردەم ئەو جورە هەستە یێ دیڤ تەدا ، کو ڤێت تو پتر لێ بهێی ژ ئەوا نوکە تو پێ هەی ، ئانکو ببیە ئەو ڤێرژنێ پتر گەشەکری ژخۆ . ئەڤەژی ژلایەنێ شیانێن تە وەک مرۆڤ یان ژی شێوازەکێ پێشکەفتی ترێ خۆگونجاندنا تە دگەل وێ ژیانا تودژی و ئەو بەهنگاریێت بۆتە دهێن پەیداببیت.
ئەڤە ئەو دوخەیە ژ مرۆڤی ئەم بزاڤ دکەین تێبگەهین ، وەکی گازیەکە بۆ گهورینێ ، تێپەربوونە ژ ئەو بوونا ڕۆتینی ژ مرۆڤەک کو پێ هەیە .
ئەوا سەرنج ڕاکێش ئەڤەیە ، کو ئەو دیاردە و بنەما چنە کو ڤی دۆخی بۆ مرۆڤی دخولقینن ؟ ئەو چ بنەمایێ جەوهەرییە د بابەتێ گهورینا مرۆڤی بۆ باشتر و کاملتر ، ئەو بوونێ کو مرۆڤ بۆ هاتییە بەرهەڤکرن د چارەنڤیساوی دا .
“ ئەو تشتێ یێ ژ هەمییا پتر تو پێتڤی و تەدڤێت یێ ل وی جهی یێ ژ هەمییا کێمتر تەدڤێت بەرێ خۆ بدەیێ و لێ ئامادەبی “
ب دەڕبرینەکادی یا یۆنگی ؛
‘’ ترساتە ل کیڤەبت ، ئەرکێ تەیێ ل وێرێ ‘’
گهوڕینا کەسایەتیێ و بەرفرەهبوونا وێ ڕۆیددەت دەمێ تو خۆ دبەیە وی جهێ زەحمەت و مەترسیدار د ڕێکاتەدا ( هەکە تە بەرپسیارەتییا ڕێکەکێ هلگرت بیت ) ، کو تو هەردەم خۆ ژێ ددەیە پاش یان ب کێمی ڤە تو مەیلداری بۆ ژێدانەپاشا وان تشتان . وەکی وێ یە مرۆڤ خۆ دبینت مەزنتری وی تشتی یە یێ ژێ دترسیت هەکە شیا سەرکەفتنێ د وێ بەرهنگاربوونێ بینت . یان ژی د چارەکرنا وێ ئاریشێ . داکو ئەڤە بتنێ وەکی ئامۆژگاریەکا جانا ب سەرڤەییا ڕاهێنەرێت گەشەپێدانێ لێ نەهێت ، لڤێرە پاڵپشتیەکا بایلۆجی ژی بۆ ڤێ چەندێ هەیە ، ئەوژی دەمێ تو تاکەکێ بدانییە د بارودوخەکێ نوی دا ، کو ئەو دوخە ئەزموونەکا نوی بیت و یێ ب سترێس و فشار بیتن ، د دەرئەنجام دا ، دێ جینێن نوی د کوئەندامێ وی یێ دەماری دروست بن ، ژبەرکو دوخەکێ نوی یە تویێ کەفتیێ ، ژبەرهندێ پێکهاتێن نوی یێن دەماری ئاڤادبن . ئەڤە چ ڕامان ددەت ؟ ل وێرێ د دەروونێ تەدا شیانێن نخافتی هەنە ، وەکی بێژی د قفلکری نە و نادەرکەڤن ، تنێ وی دەمی دا نەبیت کو تو بکەڤییە د بەرهنگارییەکا نوی دا ، و ئەڤە فشارێ ب ئێخیتە سەر تە . کو ئەڤ شیانێن دەروونیێن هەنێ ، د ڕەهەندێ بایلۆجی ژی ڕەنگڤەددەت .
لڤێرە گریمانەکا سەرنجڕاکێش تر هەیە ئەوژی تو وەک مرۆڤ دەرئەنجامێ بایلۆجیێ هەمی وان مرۆڤای یێن بەری تە هاتین ، مەبەست پێ پێشینانێن تە ، ئەڤە وێ دگەهینت کو مرۆڤ ب شێوازەک ژ شێوازان هەلگرێ وان ئەزموونایە یێن مرۆڤ د مێژویا خۆیا دیر و درێژ دا ئەزموون کرییە ، وەکی شێوازەکێ ڕەفتارییە کو د مرۆڤی دا هەلگرتی نە .
و هەروەسا ئەڤ تەکنیکا بەرهنگاری بوونا ترس وئەرکێن ب زەحمەت ئێک ژ ناڤەروکێن چارەسەرییا دەروونییە ، د مەیدانا کلینیکی دا . و بەلکی ئەڤە چیرۆکا دێرینا مرۆڤی بیت ، بەرهەنگاربوونا ئەژدیهای و ڤەدیتنا گەنجینەکا پڕ بها د ئەنجامێ سەرکەفتنا پەهلەوانی دا .
ئەژدەها نواندنەکە بۆ ترس و زەحمەتییا وان دوخ و ڕێگران ، و گەنجینا بدەستڤەهاتی ژی ئەو بەرفرەهبوونا کەسایەتیێ و بلندتر بوونا وێ یە.
نڤیسەر: محەمەد فەقێ