من دڤێت ئەز ئێدی دانپێدانێ بکەم کۆ ب تەمامی یێ پشتگوهاڤێتی مە ژ لایێ ئەڤێ خێزانێ ڤە، ئەڤە هەیامەکە یێ بتنێ مە دناڤ ڤێ ژینگەها مەزن دا، تا ڤی ڕاددەی من مفایێ خۆ نینە؟ !
"تۆ ببێژی ژیانا تە ب چ ئاوای بیت دەمێ چ پیدڤییاتی ب تە نەهێنە قەتاندن " !
تەنانەت لبیرا منە بەرییا هەیڤەکێ خیشکا خۆدانا من، دا کۆ من بکاربینیت، وێ قەهوەکا (ئێکسپرێسو) بسەر من وەرکر، یا ڕەش بوو، لسەر سەرێ وێ ژی ب دندکەکا گەنمی نەخشاند بوو، ئەو نیڤ دەمژمێر بوو پێڤە !
پاشی ئەز برم و دانامە لسەر مێزەکا لێکدای، پاتەکێ تولی یێ رەنگ سپی، هندەک گولێن سور، دگەل دوو سێ پەڕتووکەكان دانابونە سەر ئێک.
ئەو هوسا ب من ڤە شەپرزە بوو! نە دزانی من ب دانیتە کیژان جهی، گاڤ لتەنشت گولان ڤە، گاڤ ژی دگوت :
_نەخێر ! ئەگەر ئەو لدەف پەڕتووکان بیت، بێگومان دێ وێنەیێ من جوانتر لهێت، و خەلك هزرکەن کۆ ئەز گەلەک یا ب ئەتەکێت و ڕەوشەنبیرم. !
پشتی دەه.. نەه.. وێنەیەك گرتین، لدووماهییێ ڕوینشتە لسەر مێزێ و دەست هاڤێتە چنگلێ من و د بەر را بەرێ خۆ ددا وان وێنەیێن گرتین .
پاشی ئەز دانامە لسەر مێزێ ڤە، و مژوویل بۆ ب بەرسڤدانا پەسنێن هەڤالێن خۆ یێن سوشیال میدیا یێ، پشتی کۆ ئەو وێنە کریە پوست، وێنەیێ ( من و پەڕتووك و گولان ) هێش دوو سێ قورمەك ل من نە دایین خودانا من بژوڕ کەفت...
خیشکا وێ بلەز لسەر کورسیا خۆ ڕابوو و گوتێ:
_ببورە من کوپێ تەیێ بکارئینای، ڕەنگێ وێ یێ ڕەش گەلەک دگەل وان پەڕتووکێن من شنوی کرین د گونجیت!
خودانا من بەرسڤدا، هەر وەکی خیسارێ بەرسڤا وێ یا گرتی:
_چنینە، پاشی بشو و بدانە جهێ وێ ڤە .
ئەز یێ ل خودانا خۆ خەریب بویم ! ل وێ جیهانا ئەو بۆ خۆ ددانیت، هزروبیرێن وێ، ژ وان پەڕتووکان یێن من دبەنە سەدان جهان !
بوچونێن وێ لدور بابەتان...
چبکەم ئەوێ زوی پێدڤی ب من نابیت.
پشتی کۆ خیشکا وێ ئەز شیشتیم، و بێهنەکێ هێلایم ژدەزڤە دا هشك ببم، هێش هندەک چپکێن ئاڤێ ب رویێ من ڤە بوون، وێ گوت کا دا ئەز تە بدانمە جهێ وێ، بەرێ چ دەردەسەریا بسەرێ من بهینی !
دیسان چوومە جهێ خۆ یێ تاری و بێدەنگ، د لێنانگەها خێزانەکێ ڤە یا کۆ چ جاران بێی مڕوڤ نابیت، بتنێ خۆدێ دزانیت کا ئەو کەنگی تێر دبن. !
جارەکێ، کوپەکێ کەڤن د گوتە من:
_ د بەرێ دا گەلەك خۆش بوو، مە کوپان دزانی کەنگی مڕوڤ دانێت خوارنێ دخۆت و کەنگی لێنانگەهێ بجهدهێلن لێ د نوکە دا، ژیانا وان ب تەمامی یا تەڤلی هەڤ بوی......
پشتی بورینا حەفتییەکێ، ڕەوشا من گەلەک نە باش بوو، ئەز ژ بچیکترین و مەزنترن تشت بێزار بوم، من دخواست چ ڕویبدەت، بلا ڕویبدەت بتنێ ئەز ژ ڤێ ڕەوشێ رزگار ببم!
ڕۆژ بەر ب ئاڤابوونێ ڤە چوو، خودانا من هاتە هنداڤ سەرێ من ! وەی هەوار .. خۆ ئەز ژ خودانا خۆ یا کارتێکەر ژی یێ بێزارم!
ئەز ڕاکرم و ب شیرەکێ گەرم تژی کرم، و بڕمە وێ قوڵاچا ژوڕێ یا کۆ خیشک و برایێن خۆ هوشدار کرین نێزیك نەبن.
ئەندامێن خێزانێ هەر یێن دهێن و دچن و ئەو ژی هەر یا بەرێ خۆ ددەتە وێ پەڕتووکا بڕەخ خۆ ڤە دانای، داکو تەمام بکەت، ئەڤ جارە ئەو گەلەك یا ئالوز بوو، تا وی ڕادەی خۆ کەزییا خۆ ژی هەمی نە ڤەهاند بوو .
من هند دیت ئەو ڕابوو ڤە، پیچەکا پەنجەرێ ڤەکر، هەوای خۆ ل مژیلانکێن وێ یێن درێژ دان، شیتکا کراسێ وێ لڤلڤی ... هەناسەک کێشا و چۆ د هزران دا...
بۆ من ژی هزرەک چێبوو!، ( ئەی با وەره من ژ ڤێ ژیانێ ڕزگار بکە.. ) بەرێ خۆ ددەمێ خودانا من چوو لبەر خۆدیکێ، وەکی نەریتێ وێ یێ هەر جار، وێ دگەل خۆ د ئاخفت ! وێ دگووت:
"دڤێت بزانی ئەگەر تۆ هەمی مڕوڤێن جیهانێ ببینی و خۆ نە بینی، هەر وەکی تە چ نە دیتی !
ئەگەر بەرێ خۆ نە دەیە خۆدیکێ دێ چەوا زانی چ کێماسی لتەیە ؟ کۆ خودیکا تە ژی گوتن و کریار و ئەنجامێن تەنە " هێ..! ما من نە گوتە هەوە خودانا من تشتێن جێواز دبێژیت.
زڤریڤە لنک من و فرەك ل شیری دا، بای بتەمامی سار کربوو !
دەربرینەکا نە ڕحەت کر ، و گوتە خیشکا خۆ:
_ کوپێ من یێ مەزنە، زوی تشت تێدا سار دبن .
_بەلێ گەلەکێ جوانە، ئەگەر تە نەڤێت بدە من ؟
_بلا، بخۆ ببە.
و ژ وێ ڕوژێ وەرە ڕۆژەك نینە ئەز لبەر پییا نە بم، سێ جار جاران نە هێمە شیشتن، جارنا دلێ من لسەر هزارێ خۆ لێدەت، د دترسم د دەستێن وان دا پرت پرت ببم ..
" وەی خۆدا تە دابوو، بەلێ من نە دزانی خوشیا پێ ببەم !
نڤیسەر: وجدان فيصل