شلوڤەکرنا دەستپێکرنا پرۆژەی: رێبەرەکێ ساناھی بۆ دەستپێکرنا پرۆژەیان ب دروستی

 دەستپێکرنا پرۆژەیەکێ نوی دبیت جاران ب زەحمەت بھێتە دیتن، لێ تێگەھشتن ب زاراڤێن سەرەکی دێ تیمێ تە بەرەڤ سەرکەفتنێ بەت. د رێڤەبرنا پرۆژەی دا، دەستپێکرن (Initiation) قوناغا ئێکێ یە د ژیانا پرۆژەی دا، کو پاشان پلاندانان، بجهئینان، و ب دووماھیئینان ل دیڤ دا دهێن. د ڤێ پێنگاڤا گرنگ یا ئێکێ دا، تو بنەمایێن ھەمی پرۆژەی ددانی بەری کو کارێ گران یێ دروست دەستپێبکەت.

دیارکرنا مەرەم و ئارمانجێن پرۆژەی

ھەر پرۆژەیەکێ سەرکەفتی ب ئەگەرەکێ روون بۆ ھەبوونا وێ دەستپێدکەت. ئەڤ "بۆچی" یا بنەرەتی وەکو کەیسێ کاری (Business case) دھێتە نیاسین، کو ئەگەرێ دەستپێکرنا پرۆژەی یە. دەمێ تو د مەرەمێ دگەھی، پێدڤیە تو ئارمانجەکا روون بۆ پرۆژەی (Project goal) بدانی، کو ئەنجامێ چاڤەرێکری یێ پرۆژەی یە. بۆ پێڤانا وێ چەندێ کا تو چەوا بەرەڤ وی ئەنجامی دچی، تیم زۆر جاران ئارمانج و ئەنجامێن سەرەکی (OKRs - Objectives Key Results) بکار دئینن، کو تێکەلەکێ ئارمانجەکێ و پێڤەرەکێ نە بۆ دیارکرنا ئەنجامەکێ کو بھێتە پێڤان. بجهئینانا ڤان ئارمانجان دێ د دووماھیێ دا مفایێن پرۆژەی (Benefits) کەتە راستی، کو قازانجێن چاڤەرێکری یێن پرۆژەی نە.

دانانا سنوورێن پرۆژەی

بەری کار دەستپێبکەت، گەلەک گرنگە کو قەبارە یان سنوورێ پرۆژەی (Scope) بھێتە دیارکرن، کو رامانا سنوورێن پرۆژەی ددەت. سنوورێ پرۆژەی دیار دکەت کا چ د ناڤ پرۆژەی دا ھەیە یان چ ژێ ھاتیە دەرخستن، ئانکو پرۆژە چ بخۆڤە دگریت، و چ بخۆڤە ناگریت. بۆ وێ چەندێ ھەمی کەس د ئاگەھدار بن ب ئەو کارێن کو د پلانا پرۆژەی دا ھەنە و بۆ گەھشتن ب ئارمانجا پرۆژەی، دڤێت بزانن کو چ کارێن د ناڤ سنووری دا (In-scope) هەنە. ژ لایەکێ دی ڤە، ئەو کارێن کو د پلانا پرۆژەی دا نینن و هاریکار نینن بۆ ئارمانجا پرۆژەی وەکو کارێن دەرڤەی سنووری (Out-of-scope) دھێنە ھژمارتن. دانانا ڤان سنوورێن روون د دەستپێکێ دا ھاریکاریا تە دکەت کو ب دروستی بودجەیێ خۆ (Budget) دیار بکەی، کو ئەو کوژمێ پارەی یە یێ کو پرۆژە پێدڤی پێ ھەی بۆ تەمامبوونێ.

دەستنیشانکرنا کەسێن گونجای

پرۆژە بێی کەسان نەشێت بەرەڤ پێش بچیت. ئەو کەسێن پشکدار دبنە خودان بەرژەوەندیێن پرۆژەی (Stakeholders)، کو ھەر کەسەکێ ل خۆ دگریت یێ کو پشکدارە د پرۆژەی دا و بەرژەوەندیەک د سەرکەفتنا پرۆژەی دا ھەی. ئاڤاکرنا پێکھاتەیێ دروست یێ تیمێ پێدڤی ب دیارکرنا رۆلێن سەرەکی ھەیە. ل سەرپەرشتیا کاران، رێڤەبەرێ پرۆژەی (Project manager) ھەیە، ئەو کەسێ کو پلانێ دادنیێت، رێکدێخیت، و سەرپەرشتیا ھەمی پرۆژەی دکەت. هەر وەسا پرۆژە ب پشتەڤانی ژ لایێ سپۆنسەرێ پرۆژەی (Project sponsor) ڤە دھێتە کرن، ئەو کەسێ بەرپرسیار ژ پرۆژەی و ئەوێ پشتراست دکەت کو پرۆژە مفایێن کاری یێن لسەر رێککەفتین بجهـ دئینیت. ل دووماھیێ، بجهئینانا دروست ب رەنگەکێ مەزن لسەر ئەندامێن تیمێ (Team members) دمینیت، ئەو کەسێن کو کارێ رۆژانە دکەن و پرۆژەی بجهـ دئینن.

دروستکرنا بەلگەنامەیێن سەرەکی

بۆ ب دەستڤەئینانا رازیبوونا فەرمی و رێکخستنێ، قوناغا دەستپێکرنێ پێدڤی ب ھندەک کارێن کاغەزی یێن تایبەت ھەیە. ئەڤ پرۆسەیە بێ گومان ب پێشنیازا پرۆژەی (Project proposal) دەستپێدکەت، کو بەلگەنامەیەکە د دەستپێکا پرۆژەی دا دھێتە نڤیسین. ئەڤ بەلگەنامەیە ب رەنگەکێ کاریگەر قوناغا دەستپێکرنێ ددەتە کارکرن ب رێکا رازیكرنا کۆمپانیێ بۆ وێ چەندێ بەرەڤ پێش بچیت دگەل پرۆژەی. دەمێ سەرکردایەتی رازیبوونێ ددەت، رێڤەبەرێ پرۆژەی دێ پەیماننامەیا پرۆژەی (Project charter) دروست کەت، بەلگەنامەیەک کو ب روونی ھویرکاتیێن سەرەکی یێن پرۆژەی دیار دکەت. ب فەرمیکرنا ڤان بنەمایان، پرۆژەیێ تە ب فەرمی دەستپێکریە و ئامادەیە بۆ چوونا د ناڤ قوناغا پلاندانانێ دا. سوپاس بۆ خاندنێ و هیڤیا مفایی. بۆ بابەتێ بهێت بەحسی قوناغا پلاندانانێ کەین.



نڤیسین: احمد مصطفى

ژێدەر:
Google Project Management Professional Course