هەیفا رەمەزانا پیروز ل بەر دەرگەهی یە..
مێڤانەکا گرانبها کو سالێ جارەکێ سەرەدانا دلێن مە دکەت.
لێ پسیارا گرنگ ئەڤەیە: ئایا ئەم تنێ ل هیڤیا گوهۆرینا "دەمێن خوارنێ"ی نە، یان ئەم ل هیڤیا گوهۆرینا "نەفسا خۆ"ی نە؟
رۆژیگرتن نە تنێ برسیکرنا جەستەیی یە،
بەلکو دەرفەتەکا زێرینە بۆ:
- پاقژکرنا دلی ژ کەرب و کین و نەخۆشیان.
- رێکخستنا مێشکی دگەل پەیڤێن خودێ.
- پاقژکرنا ئەزمانی ژ ئاخفتنێن بێ مفـا.
بلا ئەڤ سالە رەمەزانا مە نەبیتە عەدەت و تەقالید، بلا ببیتە گوهۆرینەکا راستەقینە کو شوینوارێن وێ ل سەر رەفتارێن مە دیار بیت.
وەرزێ پاقژکرنا روحێ و نوویکرنا پەیمانێ🫀🧎
دگەل نێزیکبوونا بایێ رەحمەتێ و هاتنا مەها خێر و بەرەکەتێ، سرودەکا ئیمانی ل سەر لێڤێن مە بلند دبیت. مەها رەمەزانێ نە تنێ پارچەکا دەمی یە ل سەر ساڵنامەیا سالێ، بەلکو دەرفەتەکا زێرینە بۆ هەر ئیماندارەکێ و خودان هزرهکی دا کو ب لێگهریانهکا کویر د ناڤ جیهانا خو یا ناڤخۆیی دا بچیت و تۆزا ماندیبوونێ ژ سەر روحا خو ب هەلینیت و نەهێلیت.
دا کو ئەم ب راستی پێشوازیێ ل ڤێ مێهڤانا گرانبها بکەین، فەرە ئەم ب ڤی رەنگی خو بەرهەڤ بکەین:
1. زەلالکرنا ئاوێنەیا دلی
بەری هەر تشتەکێ، پێدڤیە ئەم دلێ خو ژ هەر کین و گرێیەکا دونیایی پاقژ بکەین. مروڤێ رۆژیگر، ئەو نینە یێ تێشت و فرافینا خو هێلای، بەلکی ئەو مروڤە یێ دلێ خو ژ نەیاریێ پاقژ کری و ئنیتەکا سادە و پاقژ دگەل خودێ و مرۆڤایەتیێ گرێدای.
2. ئاڤەدانکرن ب پەیڤێن خودێ
بلا قورئانا پیرۆز نە تنێ پەرتووکەکا ل سەر مێزێت مە بیت، بەلکی بلا ببیتە رێبەرێ هزر و رەفتارێن مە. وەک نڤیسەر، بلا ئەم ل رامانێن وێ یێن کویر بگەریێن دا کو هزرا مە پێ رۆهن ببیت و پەیڤێن مە ژ بەرەکەتێ بێ بەهر نەمینن.
3. رۆژیا زمان و ئەندامان
جوانترین نڤیسین، ئەو نڤیسینا ب کریار دهێتە چەسپاندن. بلا زمانێ مە ژ زێدەگۆتن و پاشملەئاخفتنێ رۆژیێ بگریت، و دەستێن مە ببنە کانیێن خێر و ئاڤادانکرنێ.رەمەزان قوتابخانەیا بلندکرنا رەوشتی یە، نە بتنێ گوهۆرینا خشتێ خوارنێ یە.
4. ئامادەکاریا جەستەیی و دەروونی
راهێنان کرن ل سەر کێم خوارنێ و کێم خەوی یێ ل ڤان رۆژێن مایی، دێ مە پتر ئامادە کەت کو ب دلەکێ گەش و جەستەیەکێ چالاک پێشوازیێ ل شەڤبێریێن رەمەزانێ و نڤێژێن تەراویحان بکەین.
دووماهی پەیڤ:
هەڤالێن هێژا.. بلا رەمەزانا ئەڤ سالە نەبیتە دووبارەبوونا سالێن چوویی، بەلکو بلا ببیتە دەسپێکا ژیانەکا نووی، ژیانەک کو تێدا ئەم ب پەیڤ و ب کریار بەرەڤ خودێ و جوانیێ پێنگاڤان بهاڤێژین.
خودێ مە بگەهینتە وێ مەها پیرۆز و رۆژی و نڤێژێن مە هەمیان قەبوول بکەت.
اللهم بلغنا رمضان 🤲
"بلا ئەڤ مەهە ببیتە وەرچەرخانەک د ژیانا مە هەمیان دا. روژی و نڤێژێن هەوە قەبویل بن."
نڤیسین: سالار وحید رمضان