رێک ب بەرفرەهی بڤی رەنگی یە (خال ب خال لدویف هەرە د ژبەرکرنێدا)
- قورئانەکا تایبەت بو ژبەرکرنێ بو خو دەست نیشان بکە و یا باشتر ئەوە کو ژ قورئانا(المدینة المنورة)بيت، چونکی هەر لاپەرەک هاتیە دابەشکرن بو (15) رێزان. (باشتر ژی ئەوە کو ژ وی جوری بیت یێ کو هەر جوزئەک جودا جودا هاتیە چاپ کرن)
- خاندنا روژانە بو ژبەرکرنێ لاپەرەک بتنێ یە ژ قورئانا پیروز، و زێدەتر لێ نەکە هەر چەندە بەرێ نو کە تە ئەو لاپەرە ژ بەر ژی کربیت.
- ل دەستپێکێ لاپەرەی(20)جارا بخوینە ب خاندنەکا سروشتی، و باش تەماشەی پەیڤ و لڤوکێن وان بکە(الکلمات و حر کاتها) ژ هەر ئێک ژ "سەر و ژێر و بور"(فتحة و کسرة و ضمة)، ئەگەر د لاپەرێ روژانە دا خاندنا پەیڤەکێ ل بەر تە ب زەحمەت بیت گوهداریا تومارا خاندەڤانەکێ رەهوان بکە وەکی تومارا شێخ محمود خلیل الحصري(خودێ ژی رازی ببت) ژ خو ئەگەر تە ماموستایەکێ رەهوان هەبیت کو ل دەف وی بخوینی هێشتا باشترە، دا کو پەیڤێن وی لاپەرەی ل سەر زمانێ تە ب ساناهی ببن ب رێکا پتر خاندن و دووبارەکرنا وان پەیڤان ب ساناهی، و مەرەم ژ دووبارەکرنا خاندنێ ئەوە دا کو پەیڤ و ئایەت ب ساناهی و ب رەنگەکێ دروست بهێنە ژبەرکرن، چونکی ئەگەر پیتەک یان لڤوکەک (الحرف أو الحركة)خەلەت هاتە ژبەرکرن راستڤەکرنا وێ د ئایندەی دا دێ یاب زەحمت بیت چونکی د مێشکی دا د هێتە کوپیکرن
- هەر ژ رێزا ئێکێ دەست ب ژ بەرکرنێ بکە، پشتی ژبەرکرنا وێ رێزێ (10 جاران)لێزڤرینێ(مراجعة) لێ بکەت تا کو باش رەهوان دکەی، د دویفدا وەرە رێزا دووێ و دەست ب ژبەرکرنا وێ بکە و دیسان(10 جاران)لێزڤرینێ بکە، دەمێ ژ ژبەرکرنا رێزا ئێکێ و دووێ ب دووماهێ هاتی هەر دوو رێزان(10 جاران) پێگڤە بخوینە و لێزڤرینێ لێ بکە، و هەر هوسا و ب ڤی رەنگی دەمێ ژ هەر رێزەکێ خلاس دبی دگەل رێزا بەرێ وێ (10 جاران)پێگڤە بخوینە و لێزڤرینێ لێ بکە تا کو لاپەرەی هەمیێ ب دووماهی دئینی، د دیفدا لاپەرەی هەمیێ(10 جاران)ژبەر و بێی کو تەماشە بکەی بخوینە، ئەگەر پەیڤەک ل بەر تە ب زەحمەت کەفت تەماشەی جهێ وێ پەیڤێ بکە و چەند جاران دووبارە بکە تا کو باش رەهوان دکەی و دیسان جارەکا دی لاپەرەی ژبەر بخوینە ڤە، پاشان پێکولێ بکە کو ئێک ژ ئەندامێن خێزانێ یان هەڤالەکێ تە یێ قورئانێ گوهداریا خاندنا تە بکەت و ژبەر بو وی بخوینە(دبیت ئەو هەڤال ئێک ژ ئەندامێن خێزانێ یان هەڤالەکێ تە بیت کو بو خودێ هەوە پێکڤە سوز ل سەر ژبەرکرنا قورئانا پیروز دابیت)دیسان ئەگەر دیار بو کو جهەک ل بەر تە ب زەحمەت کەفت جارەکا دی وی جهێ رەهوان بکە و بلا دووبارە گوهداریا خاندنا تە بکەت.
- ل دەمێ لێزڤڕینا تە بو ژبەرکرنا کەڤن دبیت توشی ژبیرکرنێ ببی د هندەک جهاندا یان د هندەک ئایەتاندا د لاپەڕەیەکیدا و ئەو جھ ل سەر تە ب زەحمەت بکەڤن، ل وی دەمی دێ تەماشەی وی جهی یان وی لاپەڕەی کەی و چەند جاران ب تەماشەکرن ب باشی دێ دووبارەکەی و پاشان وی لاپەڕەی ژبەر و ب کێمی دوو جاران دێ دووبارە کەی تاکو باش ڕەهوان دکەی، ب مەبەستا ب ساناهی کرنا جهێن ب زەحمەت، تومارەکا نڤێسینا تێبینی یان بو خو ئامادە بکە دا کو تێدا تێبینی یێن خو ل سەر ژبەرکرنێ ل وان جهێن ب زەحمت تومار بکەی، دا کو بشێی بساناهی ل دەمێ پێتڤی ل وان تێبینیان ب زڤڕی، ب ڤی ڕێکێ ئەو جهێن ب زەحمەت د مێشکێ تە دا دێ کوپی بن و چ جاران ژبیر ناکەی.
- دا کو بشێی قورئانا پیروز ب باشی ژبەر بکەی دەمەکێ گونجای بو خو دەست نیشان بکە کو بەردەوام د وی دەمێدا ژبەر بکەی و بو تە ببیتە سروشت لێ زێدەگاڤیێ تێدا نەکەی،بڕەنگەکێ بیت کو ئەو دەم کارتێکرنێ ل دەمێن خارنێ و چوونا قوتابخانێ یان چوونا سەرکاری نەکەت، چونکی ئەگەرێن بێ تاقەتی و لاوازی د ژبەر کرنێدا ل دەف هندەک ژبەر کەران بو وێ چەندێ د زڤڕیت دەمێ بەردەوام گهورینێ د دەمێ ژبەر کرنێدا دکەت، ئانکو ڕوژەکێ پشتی نڤێژا سپێدێ و ڕوژەکێ پشتی نیڤرو و ڕوژەکێ پشتی ئێڤاری ژبەر دکەت، یان دبێژیت ئەڤڕو پشتی مەغرەب دێ ژبەر کەم و سوباهی پشتی عەیشا، لەوما گهورین د دەمێدا ئیرادا تە لاواز دکەت و ڤیانا تە کێم دکەت د ژبەرکرنێدا ، ژبەر ڤێ چەندێ دەمەکێ گونجای بو ژبەرکرنا قورئانا پیروز دەست نیشان بکە.
تێبینی:-
نابیت دەست ب ژبەرکرنا لاپەرێ نوی بکەی تاکو یێ پشت ڕاست نەبی ژ وێ چەندێ کو تە لاپەڕێن بوری یێن رەهوانکرین.
ئاگەهداریێن گرنگ
لێزڤڕینا کەڤن دێ هێتە کرن پشتی کو ژبەرکرنا نوی یا ڕوژانە تەمام دبیت و باش دهێتە ڕەهوانکرن، و بو لێزڤڕینا کەڤن باشترین د دەمێ گونجای بو خو دەستنیشان بکە،(بەرەکاتا خودێ ل تەبیت برایێ هێژا) بزانە لێزڤڕین گرنگترە ژ بەرکرنا نوی...!!
باشترین دەم، دەمێ پشتی نڤێژا سپێدێ یە، چونکی:
- دلوڤانییا خودایێ مەزن ل وی دەمێ دهێتە خار.
- ل ڤی دەمی هێشتا ئەم نێزیکی دەمێ نڤێژا سپێدێ ینە.
- خاندنا قورئانا پیروز ل دەمێ زوی ژ رۆژێ دا، ڕوژا دووماهیێ بو مروڤی دبیتە دیدەڤان ب گوتنا خودایێ دلوڤان.( إِنَّ قُرۡءَانَ ٱلۡفَجۡرِ كَانَ مَشۡهُودٗا) الإسراء:78
خودایێ دلوڤان د سێکا شەڤێدا دهێتە خار بو ئەسمانێ دونیایێ (هاتنەکا ژ هەژی مەزناهیا وی ) و دگەلدا بەرەکەت و دلوڤانی دهێنە خار و ئەڤ بەرەکەت و دلوڤانی یە هەتا دەمەکی پشتی نڤێژا سپێدێ ژی دمینیت، ئەفجا دەمێ تو پشتی نڤێژا سپێدێ دەست ب ژبەرکرنا قورئانا پیروز دکەی ب ئاناهیا خودێ هێزەکا سەیر دێ بینی د ژبەرکرنێدا و لەزاتیەکا سەیر و ل بیرمانەکا سەیر ژی دێ بینی، ئەفجا ڤی دەمی تایبەت بکە بو قورئانا پیروز و خو ب چ تشتێن دیڤە مژویل نەکە، ئەگەر بو ماوێ چارێکەک یان نیف دەمژمێرێ ژی بیت یان بو ماوێ دەمژمێرەکێ بیت لدویف دەمێ تە کا چاوا دخازیت.
ڕوژا ئەینی ڕوژا بێنڤەدانا تەیە د هەر حەفتیەکێدا، ئانکو نە تو ژبەرکرنا نوی دکەی و نە لێزڤڕینا بەرێ، بێنڤەدانا تە بو وێ مەبەستێ یە دا کو مێشکێ تە ئارام ببیت و ب ئاناهیا خودێ بو چالاکیا حەفتیا نوی ئامادە ببی و ژ نوی دەست پێ بکەیە ڤە.
ژبیر نەکەی هەڤالێ تەیێ قورئانێ گوهداریێ بو خاندنا تە بکەت ژبەر.
کی نابێژیت د ڤێ سالێدا یان د ڤێ هەیڤێدا یان هەر نوکە خاترا خو ژ ڤێ ژیانێ بخازیت و بێگومان ئەو ڕوژە هەر دێ هێت.
كُلُّ نَفۡسٖ ذَآئِقَةُ ٱلۡمَوۡتِۖ ثُمَّ إِلَيۡنَا تُرۡجَعُونَ
هەمی كەس دێ تامكەتە مرنێ [كەس ژێ قورتال نابیت]، پاشی هوین دێ ب بال مەڤە زڤڕن.
ئەم بو ڤێ دونیایا خو ژ دل کاردکەین و هەمی شیانێن خو د مەزێخین بو بدەستڤە ئینانا مال و سامانی .. و کوم کرنا مال و سامانی کار و ئارمانجا مەیە د ڤێ دونیایێ دا ب مەبەستا وێ چەندێ وەکی دبێژین:( مال و سامانی کوم دکەین دا کو پاشەڕوژا خو پێ مسوگەر بکەین)
ئەرێ (مە قورئان ژبەرکریە دا کو ئاخرەتا خو پێ مسوگەر بکەین)؟؟
نڤیسین و کورتکرن: رێژین عیماد عبداللە