بیردوزا ڤیكتور فرانكل دەربارەی رامانێ سەرنجێ ددەتە ل سەر لێگەریانا رامانێ بو ژیانێ، ب تایبەت د بەرگیریكرنا ئازاراندا.
زانا(فرانكل) بیردۆزا خۆ د كەمپەكا سەربازی یا نازی دا دانا، دەمێ وەكو نوژدار ل ئەوێ كەمپێ دا كاردكری، ئەوژی دەمێ تەماشەی زیندانیا دكر كو هندەك ژ ئەوان د زیندانێ ڤە د مرین و هندەك ژ ئەوان د ژیانێ دا زیندی ماین.
فرانكلی وەسا د دیت كو ئەو كەسێن هیڤی و ئومێد د ژیانێ دا هەبن كو دێ ل پاشەروژێ دووبارە ڤەگەرنە ڤە ناڤا كەس و كارێن خۆ دا و دێ پرۆژێن خۆ د پاشەرۆژێ دا بجهئینن؛ دەلیڤا مانا ئەوان د ژیانێ دا پترە ژ ئەوان كەسان ئەوێن هیچ هیڤی و ئومێدەك د ژیانێ دا نەما بیت.
فرانكلی شێوازەكێ نوی یێ چارەسەریا دەروونی ئاشكەراكر و ناڤێ وێ كرە (چارەسەریا ڕوحی یان چارەسەریا رامانێ)، ئەوی وەسا د دیت كو بو چارەسەركرنا هەر كەسەكی دڤێت ئەم ئارمانجێن ژیانا وی بۆ دەستنیشان بكەین و رامانەكێ بۆ ژیانا وی دروست بكەین.
فرانكلی ئاماژە ب چەند تێگەهان كر، ئەوژی:
1-وژدان:
ژ تێگەهێن سەرەكی یێن بیردۆزا فرانكلی یە، ل دویڤ بوچوونا وی (وژدان)هەبونەكا ڕوحی یا نەستی (لا شعوري) يه، ئەڤ نەستە یێ جیاوازە ژ ئەوی نەستی ئەوێ زانا (فروید) ی بەحس كری، چونكی وژدان ل دەڤ فرانكلی بتنێ فاكتەرەك نینە د ناڤا كومەلێ دا بەلكو ژێدەرێ هەبوونا سلامەتیا مەیە.
2-بوشاییا هەبونگەریێ:
فرانكلی وەسا د دیت كو دەمێ مرۆڤ ل دویڤ رامانا ژیانێ دگەرت؛ وی دەمی دێ توشی چەندین شكەستنا بیت، ئەڤ شكەستنە ژی دێ مرۆڤی توشی نەخوشیێن دەروونی كەت.
فرانكلی باوەردكر كو دەست ڤالاهیا تاكەكەسان دبیتە ئەگەر كو تاكەكەس پتر هەست ب بێ رامانی و نەبوونا ئارمانجان د ژیانێ دا بكەت، بێزاربوون نیشانەكە ژ نیشانێن بوشاییا هەبوونا كەسی،چونكی دەمێ مرۆڤ بێزار دبیت پەنایێ دبەتە بەر چەندین شێوازێن شاش بۆ پڕكرنا ئەڤێ بوشاییێ وەك (ئالودەبوون، وخۆ مژویلكرن ب تشتێن بێ مفا ڤە).
3-لێگەریانا رامانێ
چەوا مرۆڤ رامانێ پەیدا كەت؟ فرانكلی وەسا د دیت كو سێ رێك هەنە مرۆڤ تێدا رامانا ژیانێ پەیدادكەت و بدەستڤە دئینیت، ئەوژی:
- برێكا بها و ئەزمونێت ژیانا مرۆڤی و حەژێكرنا راستەقینە و رێزگرتنا ژیانێ.
- برێكا داهێنانێت مرۆڤی و كاركرنا بەردەوام ژبۆ پەرەپێدان و پێشئێخستنا شیانێن خۆ.
- برێكا بهایێن رەفتار و وێرەكی و هلسەنگاندنا دروست بو تشتان.
و ل دوماهیێ؛ هەر كەسەك پێدڤی ب رامانەكێ هەیە بو ژیانا خو ، ئەو تشتێ گەلەك سەرنجا من راكێشایی د بیردوزێ دا ئەوە مروڤ دشێت كاودانێت ب زەحمەت ئەوێن دهێنە د رێكا مروڤی دا بو خو بكەتە رامانەك بو ژیانا خو ب رێكا سەرەدەریەكا گونجایی دگەل ئەوی كاودانی.
نڤیسین: دنيا لقمان
ژێدەر: (1)