وی هزرکر ئەز یێ مریم، من ژی هەست ب مرنێ کر، لەشێ من بووبوو بەفرا شەڤی، ب تنێ تشتەکێ گەرم ژ برینا من دهات،دنیا هەمی سپی بووبوو، تنێ خالەک د ناڤدا دیاردکر،بەقەکێ دا هشیار بمینم، ئەزمانێ خۆ ل ناڤ چاڤێن من دا، کا چەوا نێچیرا مێش و مۆرا دکەت، دووماهیک تشتێ من گوھ لێ بووی رەوینا سەیان بوو، من چاڤێن خۆ ڤەکرن، ئەز یێ ل نەخۆشخانەیێ، ئەز باوەر ناکەم ئەز یێ ساخم، خوشکا من بژوورکەڤت وهاتە هەمبێزا من" سوپاس بۆ خودێ، تو بۆ من زڤراندی، دزانم یێ وەستیایی، بەس بێژە کێ وە ل تە کرییە داپۆلیسا ئاگەهداربکەین" بێدەنگی وەکی هەوای کەتە ناڤ لەشێ من ومن دگەل خۆ گۆت:" دەربارەی وی، چو نابێژم، دێ تۆلا خۆ ڤەکەم، وەی خودێ چەند کەسەکێ خراب بوو! چەوا مرۆڤ دشێت دگەل هەڤالێن وەک وی بەردەوام بیت!؟ "
هەیڤەک وەک درێژترین زنجیراچیایێن جیهانێ لێ هات، ل بەر من هەتا برینا من خۆ دایە ڤ ئێک، ئێکەم رۆژ یا تێدا رابوویمە سەر پێیێن خۆ، چوومە جهێ بوویەرێ، ئەو جهێ دلخوازێ مە بوو، دا خوارنەکێ پێکڤە خوین، چاڤێن خۆ پرکەین ژدیمەنێن ئاڤێ و باس ل ژیانێ بکەین ، ژیانێ چ ژمە دڤێت؟ ئەم بۆچ دژین ؟ چەند ژیان مە دناڤ خۆدا دگڤێشیت هەتا چپکێن مانێ ژمە درژیت؟ گەلەک جاران ئەو خوارنا زێدە دبوو، من بۆ سەیێن وان دەردۆران دبر دا هەڤالێ من بێژیت دێ جارەکێ ژەهرێ بۆ کەمە ناڤ، کا چەوا من پشیکا جیرانا سۆت و پێ سەیەکی ژێڤەکر، من هزرکر یێ یارییا دگەل من دکەت، هەتا دووماهيك شەڤ ل پێش چاڤێن من دو بەق گرتین و ب ساخی دەست و چاڤێن وان ژێڤە کرین، پیچەک مابوو دلێ من رابیت، ئەز رابووم،من وێرڤە هاڤێت و ئەم ب شەر چووین، کێرا خۆ دو جاران د زکێ من را کر، دا من هاڤێتە د ئاڤێدا، بەلێ دەمێ دەنگێ هندەک کەسا ژدوور هاتی، ئەز هێلامە دەڤ گۆمەکێ و چوو، پاشی من ژ خویشکا خۆ زانی بوو، سەیەک دویڤ بێهنا من هات بوو، ئەز کێشا بوومە سەر جادەیا سەرەکی، هەتا هندەک ل من پەیدا بووین.
دەم بوو ئێڤار، من بەقەک گرت و زڤریمە مال و هۆسا گرتنا بەقا بۆ کارێ منێ رۆژانە و وان بەقا ژی تێشک ئینان، هەتا من زانی ئێدی بوونە گەلەک، نەشێم ل مال بهێلم من شویشەکا مەزن،هندی درێژییا مرۆڤەکی چێکر و برە ناڤ کاڤلە خانییێ مە یێ گوندی بۆ بەقان، دەمێ ژ وی کاری ب دووماهیک هاتیم، ڤێجا ل دویڤ هەڤالێ خۆ گەریام، رۆژەکێ ل بەرامبەر وی دەرکەتم، لسەر کارێ وی بوو بەرەک رەق و هەر وەکی بەفر ل سەر باری سپی و سار بوو، بەس من وەک هەتاڤێ خۆهاڤێتە هەمبێزا وی،من گۆتێ گەلەک یێ ژتە خەریب بوویم، لێدانێن دلێ وی هند بوو دا د پشتا مندا دەرکەڤن، من ل بەر گوهێ وی گۆت یا چووی من یا ژبیرکری، تو هەرهەڤالێ منی و هۆسا چەندین جاران چوومە دیدارا وی، تا من رازی کری رۆژەکێ پێکڤە بچینە گوندی، دەستپێکێ دو دل بوو، پاشی رازی بوو، دەمێ چووینە د ژوورڤە، چاڤێن وی وەک سیکوتینێ مانە ب شیشەیێ تژی بەق ڤە، چپکێن خوهێ بوونە جۆ ل سەر دێمێ وی، بەری بزڤریت من دارەک ل ستویێ وی دا، هەڤسەنگییا وی تێکچوو، من دەست و پێن وی گرێدان و جلکێن وی ژبەرکرن و دانا ناڤ شیشەی دا، هەر وەکی بەقا ژی وەسا دڤیا، هەمی پێوەر ھاتن،گۆتە من وە نەکە، من بدە ڤ پۆلیسا، دێ مافێ تە وەرگرن وپاشی بەقەک چوو د دەڤی دا و بوو ئممم ئممما وی، من گۆتێ دێ مافێ من وەرگرن نە ئازارێن من و گیانەوەرێن تە ئازارداین… ئەڤە دەمەک سەر وێ روژێ دا بۆری نزانم نوکە درندەمە یان رزگارکەرێ ئازارکێشان ؟؟؟؟؟
نڤیسین: رێزان جەعفەر