ئەتاكێت ئەو رەفتار و كردارن، ئەوێن كو مرۆڤ دگەل تشتێن رەخ و رویێن خۆ بكاردئینیت. ئەڤجا ئەو تشت گیاندار و زیندی بن یان بێ گیان و نەزیندی بن. ئەتاكێت پێكهاتیە ژ شێوەیەكی رۆتینی كو ژ مرۆڤان دهێت دیتن و ل دەڤەرەكێ بۆ دەڤەرەكا دی و ژباژێرەكی بۆ باژێرەكێ دی و ژ وەلاتەكی بۆ وەلاتەكێ دی جیاوازە. لێ دگەل هندێ ژی گەلەك لایەنێن هەڤپشك دناڤ هەمی كۆمەلگەهێن مرۆڤایەتیێ دا هەنە و هەر مرۆڤەك دشێت ئەڤی هۆنەری و ئەڤی زانستی بدەست خۆڤەبینیت. هۆنەرێ ئەتاكێتێ ژ كۆمەكا هەلسوكەفتێن جوان و هەژی پێكهاتیە كو دێ بیتە ئەگەرێ رێزگرتنا كەسێ بەرانبەر و كەسێن دەوروبەر و جڤاكی ب شێوەیەكئ گشتی.
ل كەڤن دا هەتا نهۆ هۆنەرێ ئەتاكێتێ بابەتەكێ گرنگە دناڤ جڤاكی دا و شەنگستێن جودا هەنە. هەر نەتەوە و هەر باژێر و دەڤەرەك ڤی زانستی ب شێوازێ جودا بكاردئینیت ژ پێخەمەت جوانكرنا هەلسوكەفتێن خۆ دناڤ جڤاكی دە. یا گرنگ و باش دڤی زانستی دا ئەوە كو هەر جڤاكەك وێ ئەتاكێتێ بكاربینیت یا كو دگەل جڤاك و ئاینێ وی جڤاكی بگونجیت و ب شێوەیەكێ جوان سەرەدەریێ دگەل رەوشتێن خۆ بكەت و بزاڤێ بكەت دكریار و ئاخفتنێن خۆ دا زانستێ ئەتاكێتێ پەیرەو بكەت و بكاربینیت داكو لدەف خەلكی خۆ و دناڤ جڤاكی دا رێزدار و بەرنیاس بیت ب مرۆڤ و كەسەكێ خودان رەوشتێ جوان و هەژی و رێكوپێك، چونكی ئەگەر مرۆڤ ژ زانستێ ئەتاكێتێ شارەزا نەبیت كێماسی داناڤ رەوشتێ وی دا دیار دبن و ل ئەنجام دا خەلك رەوشتێ وی ب نەدروستی ل قەلەم ددەت و ژ وی كەسی بێزار دبن.
چەند خالەك دەربارەی ئەتاكێتا ئاخفتنێ:
- پێتڤیە بەری مرۆڤ دەست ب ئاخفتنێ بكەت هزر د ئاخفتنا خۆ دە بكەت، پشتی هنگێ دەست ب ئاخفتنێ بكەت ژبەر كو مرۆڤ ب ئاخفتنێ دهێت هەلسەنگاندن
- دەمێ مرۆڤ دەست ب ئاخفتنێ دكەت، ب رێكا ئاخفتنێ كەسێ بەرانبەر دشێت هەتا رادەكی وی مرۆڤی بنیاسیت ژلایێ دەرونی ڤە
- كێم ئاخفتن باشترە ژ زۆر ئاخفتنێ. ژبەر كو ئەگەر مرۆڤ زۆر ئاخفتنا بكەت سڤك دبیت و دبیت د ئاخفتنا خۆ دە شاشیان ژی بكەت.
- ترانەكرن ب ئاخفتنا كەسێ بەرانبەر ب جۆرە بێحورمەتیەك دهێتە هژمارتن
- لدەمێ ئاخفتنێ دڤێت مرۆڤ خۆ ژ ئاخفتنێن دوبارە وەكی تێگەهشتی یان تەزانی من چگۆت و گۆتنێن ب ڤی شێوەی بپارێزیت. ژبەر كو دوبارەكرنا ڤان پەیڤان نیشانا كێم زانینا كەسێ بەرانبەر دهێتە هژمارتن.
- زۆر راڤەكرن و شرۆڤەكرنا بابەتەكی دبیتە جهێ بێزاربوونا گوهداری
- ئاخفتنا باش پێتڤی ب هەناسە و تەندروستی و بارێ دەرونی یێ باش هەیە
- بەری مرۆڤ بەحسێ تەوەرەكی بكەت دڤێت ب باشی هزر د وی بابەتی دا بكەت
- خواندنا پەرتوكان و بدەستڤەئینانا زانست و زانینێ كارتێكرنەكا زۆر دكەت سەر ئاستێ رەوشەنبیری و ئاخفتنا مرۆڤی.
- هەروەسا لدەمێ ئاخفتنێ سیمایەكێ گەش و خۆش و دەنگێ زەلال و پەیڤێن جوان و نەرم كاریگەریەكا باش دكەتە سەر گوهداران
- وەرزەشكرن و مەشق و راهێنان لسەر هەناسەدانێ، دەنگێ مرۆڤی زەلال و رەسەن دكەت
- ساربون یان ژی گەرموگوریا مرۆڤی لدەمێ ئاخفتنێ دیاردبیت.
- ئەگەر تو نەچار بوی ئاخفتنا كەسەكی ببری، دڤێت داخوازا لێبۆرینێ ژ ئاخفتنكەری بكەی و بێژیێ ببورە من ئاخفتنا تە بری.
- ئاخفتن ب هێما و ئیشارەت و ب چاڤ و برۆیان باش نینە.
ئەڤ خالە و گەلەكێن دی ئەگەر مرۆڤ بجه بینیت ڤان ئەتاكێتا دێ ب شێوەیەكێ سەرەنجراكێش هێتە پێش چاڤ.
نورهان عەلی
ژێدەر:
- پەرتوكا ئەتاكێت یا نڤیسەر ریاز فەرزۆ هەركی
- موقع “Harvard Business Review”