پۆرترێتا رۆژنامەڤانی، هۆنەرێ راكێشانا كارێكتەران ب پەیڤا

پۆرترێت ڤەگێرانا سەرهاتییا كەسەكێ یان كەیسەكێ یان ڕێكخستنەكێ یە كو بۆ خاندەڤانان جهێ گرنگیێ یە، نڤیسەر هەموو هۆنەرێ خوە یێ نڤیسینێ بكاردئینیت بۆ ڤەگێرانا وێ سەرهاتیێ هەر وەك ب پەیڤان رەنگێ ژیانێ بدەتێ.

د پۆرترێتێدا ب رەنگەكێ یەكسەر بریار لسەر بابەتی ناهێتە دان و ب رەوشەكا دیاركریدا ناهێتەبرن.

خاندەڤان بخوە ئەگەر و دەرئەنجامێ وێ پۆرترێتێ دێ دارێژن، ئەو ژی لگۆرەی وان هویركاتی و ڤەگێرانێن نڤیسەری هەلبژادتی، پۆرترێت پتر نیشاندانا دیمەنانە ل جهێ گۆتنێ. 

چاوا پۆرترێت دهێتە دارشتن؟

گەلەك شێوازێن جودا بۆ ڤەگێرانا چیرۆكێ د پۆرترێتێدا دهێنە بكارئینان، شێوازێ ژ هەمووان دیارتر ئەو شێوازە ئەوێ وەكی سینەمایێ، گرتنا وێنەیێن نێزیك( كلۆز ئەپ) و ڤەكری( واید ئەنگل) تێدا بكاردهێن. 

ل دەما نڤێسینێ وێنەیێن نێزیك كری دێ هویركاتیان دەربارەی وی بابەتی یان وی كەسی بێژیت و بۆ وێنەیێن ڤەكری ژی دێ بەحسا ڕاستیان، پاشخانە، و بۆری و زانیاریێن دی كەت.

شێوازێن وێنەیێن نێزیك كری و ڤەكری ب رەنگەكێ یەك لدیڤ یەكێ دهێنە دانان و بەردەوامیێ پێ ددەت.

پێتڤیە ئەو هەستێ مەرەقبوونێ و ئەو سەركەفتن و داكەفتنێن د ڤەگێرانا چیرۆكێدا هەی د پرانیا پۆرترێتێدا بهێتە پەیرەوكرن. 

چەند جۆرێن پۆرترێتان هەنە؟

• پۆرترێتا كەسی. 
• پۆرترێتا باژێرەك یان جهەك.
• پۆرترێتا سازیەك یان ڕێكخستنەك.

خۆ ئەگەر پۆرترێت دەربارەی كەسێ ژی نەبیت، ئانكو ئەگەر جۆرێ دووێ یان سێ بیت، پێتڤیە ئەو گۆشە بهێتە بەحسكرن یا گرێدای مرۆڤان و تەكەزێ لسەر بكەت، ئەگەر وەسا نەبیت ئەو پۆرترێت دێ بێتام و بێزاركەر دەرچیت. 

پۆرترێت چەند درێژە؟

پۆرترێت پێتڤیە دناڤبەرا ( 800 بۆ 1000 ) پەیڤان دابیت. پۆرترێتەكا كورت دبیت نێزیكی 500 پەیڤان بیت، لێ پێدڤیە د ڤی جۆریدا زانیاری راستر و رەهوانتربن دەربارەی بابەتێ دەستنیشانكری، پۆرترێتێن كورت گونجاینە بۆ وان بابەتێن كو  پشكەكن ژ رودانێن هەرنوكەی و بتایبەت كو دەمەكێ پێتڤی لبەر دەست دا نەبن بۆ دوڤچوون و لێكۆلینێن پتر. 

چاوا پۆرترێت دهێتە نڤێسین؟

گەلەك ڕێنمای هەنە، كا پۆرترێت ب چ زمان دهێتە نڤیسین.

• د پۆرترێتێدا زمانێ وەسفكرنێ دهێتە بكارئینان و مفا وەرگرتن ژ هەر ٥ هەستان واتە چ دبینی، گوهـــ ل چ دبی ...هتد.
• پۆرتریت ب تنێ نیشان ددەت و چ نابێژیت.
• د پۆرترێتێدا دڤێت زمانەكێ یەكانە و بێ هاوتا ب كاربینی.
• ئەگەر دناڤا پۆرترێتێ دا هویركاتیێن دەربارەی بابەتی تێدابن، نابیت ئەو هوركاتی ب رەنگەكێ هەرەمەكی بهێنە دانان دڤێت دگەل ڕێزكرنا جیرۆكێ بگونجن.

نڤیسەر: نورهان علی

ژێدەر: رێبەرا رۆژنامەڤانی، بەختیار زێباری