گەلەک ژمە تێگەهێ سەرکەفتنێ ب تشتەکی ڤە گرێددەن، بەلێ ئەگەر تو پسیارێ ژ من بکەی کانێ ئەز سەرکەفتنێ د چ دا دبینم؟ دێ بێژمە تە سەرکەفتن ئەوە ل دەمێ تو هەر رۆژ ل سپێدەهییان ب هزرێن ئەرێنی و ب گەشبینی ژخەو رادبی و دەست ب ئەنجامدانا کارەکی دکەی هەتا ئەگەر ئەو کارە چەند یێ بچووک بیت بەلێ ئەو کارە دشێتن باشیێ بگەهینیتە تە و دەوروبەرێن تە ئەڤجا ئەز دشێم سەرکەفتنا خۆ ب کارێ خۆڤە گرێبدەم ب وان شیانێن خودێ پێشکێشی من کرین و ئەڤرو ئەز نیشا تە ددەم چونکی ل دەڤ من بهاترین تشتە کو تە پاشەرۆژەکا گەش و ئاڤاکەر هەبیت.
بێگومان ژیان یا تژییە ژ ئالوزییان و کاودانێن سەخت بەلێ ئەڤە رامانا وێ چەندێ نادەت ئەڤە دوماهیکا تەیە و ب راوەستی، هەر ئاستەنگەکا دکەڤیتە بەرامبەری تە هێزەکا نوی ئاراستەی تە دکەت کو تو دوبارە خۆ تێدا ببینیەڤە، ئەڤجا کارێن من نموونەییا هێزێ و جوانیێ نیشا تە ددەن کو تو ژی ببیە کەسەکێ/ا خودان شیان دبوارێ خۆ دا یێ کو تو حەژێ دکەی و ئەو کارە بەرەڤ مەزناهیێ بچیت کو ل رۆژەکێ ئەز کارێن تە ببینم و شانازیێ بتە ببەم.
من دەستپێکر ژ هزرەکا سادە بەلێ ئەڤرو هزرێن من یێن داهێنانێ و پێشکەفتنێ بخۆڤە دبینن، رۆژ بۆ رۆژێ هزرێن من یێن سادە یێن بەرەف هزرێن داهێنانێ ڤە دچن، ئەرێ پا بوچی ئەو هزرێن تە هەین تو ناکەییە کریار ؟ پسیار ژخۆ بکە تە چەند هزرێن باش هەنە و تو ئەنجام نادەی، مانە هزرێن مەنە مە بەرەڤ باشیێ ڤە دبەن! چونکی ئەگەر تو ب بەردەوامی هزرێن نەرێنی بکەی دێ تە ل جهێ تە راوەستینیت و دێ چاڤێ تە بتنێ ل سەر دەوروبەرێن تە مینیت، ئەڤجا ل شوینا ئەڤێ چەندێ تو ببە ئەو کەسە کو چاڤێ دەوروبەرێن تە ل سەر تەبن ب هەر چ شێوازەکێ هەبیت ل وی دەمی تو دێ زانی کو تو نموونەییا سەرکەفتنێی و تو یا/ێ هاتییە جوداکرن ژ وان کەسان ئەوێن کو ل جهەکێ گرتی ئاسێ مایین و نەشیاین خۆ قورتال بکەن و ل هیڤیا کەسانێن دیتر دمینن کو دەستێ وان بهێتە گرتن و رزگاربکەن ئەڤجا دویرکەفتن ژ ئەڤان کەسان باشترین چارەسەرییە کو تو بەردەامیێ بدەییە رێکا خۆ سەرەرای هەمی ئەوان سترییان یێن کو بۆ تە دهێنەدانان و نەهێلە کەسانێن دیتر ب هزرێن خۆ یێن نەرێنی و ب رەشبینیا خۆ کارتێکرنێ ل سەر تە و ژیانا تە یا رۆژانە بکەن.
بەردەوامی کلیلا سەرکەفتنێ یە و نێزیک بوونە ژ گەهشتنا تە ژبۆ ئارمانج و هیڤی و خەونێن تە ژبەرهندێ بەردەوام بە ل سەر هەولدانێ و کار ل سەر خۆ بکە،ئەز تە پشت راست دکەم کو رۆژەک دێ هێت تو بخۆ شانازیێ ب خۆ ببەی چونکی کارێ تە ناسنامەییا تەیە کو تو پێ دهێیە دیتن و نیاسین و جهەکی ژ بۆ هەبوونا تە دگریتن و ناسناڤەکێ جوان ددەتە پێشیا ناڤێ تە کو تو بخۆ ئەوی ناسناڤی بخۆ دهەلبژێری و دگەل تە دمینیت ب درێژاهییا دەمی ئەڤجا بلا چیروکا تە ژ چیروکێن پڕ ژ سەرکەفتنێ و داهێنانێ بیت و تابلوییا تە یا ژیانێ یا تژی بیت ژ رەنگێن بالکێش و یێن جورەوجور یێن کو چاڤێن مروڤی بخۆ رادکێشن و مروڤ ژ دیتنا ئەوێ تابلویێ بێزار نەبیت بەروڤاژی ئەوێ تابلویێ یا کو بتنێ ب رەنگەکێ دیارکری دهێتە بکارئینان.
نڤیسەر : شەڤین صباح