دهێتە گوتن کو پاشایەک هەبوو و ئەو پاشا جارەکێ گەلەک یێ بێ زار بی، ژبەر هندێ ژی بریاردا بچیتە ناڤ خەلکی، و هەر کەسێ ئاخفتنەکا خۆش بێژتێ کو ئەو 400 دینارا بدەتێ. رابی خو ئامادە کر وبێ کو کەس پێ بزانیت ل ناڤ خەلکێ باژێری دهات و دچوو بێ کو بزانن ئەو پاشایێ وانایە. هات و چوو و ماوەک درێژ ژ روژێ دچیت بێ کو کەس ژ وی باژێری چ ئاخفتنەکا خوش بێژتێ. ل دەمێ بێ زار دبیت و بەرەف کەلها خو دچیتە ڤە، ل سەر رێکێ زەلامەک مەزن دبینیت کو یێ دارەکێ دچینیت.
رابی پاشایی ژی گوتێ مامێ بەرێز عەمر رەستێ خودێ یە بەلێ پا هەما ژ سەروبەرێ تە دیارە تو ژ 80-90 سالا کێمتر نینی، تو ڤان دارا بو چ دچینی هەکە تو هەر ل بن سیبەرا وانا نابی؟ رابی وی پیرەمێری ژی گوتێ ئەم ژی ل بەر سیبەرا هندەک دارا دماین یێت کو خودانێت وانا ل بەر سیبەرا وانا نەمای، ژبەر هندێ ژی ئەڤە خێرە و دێ هەر هندەک هەبن مفایێ ژێ بینن. سەروچاڤێت پاشایی گەش بوون، و گوت وەللا دەست خۆش، ئەڤە ئەخفتنەکا خوشە، بو تە 400 دینار!
پیرەمێری ژی پارێت خو وەرگرتن و دەست ب گرنژینێ کر. پاشایی ژی گوتێ مام تو بوچی دگرنژی؟ وی ژی گوتێ مام خەلک خو ل هیڤیا دارا خو دگرن حەتا شین دبیت ب سالا حەتا بەرهەمێ خو بدەت، ئەز بخو هێشتا من دار نەچاندی من بەرهەمێ وێ خار. پاشایی ژی گوت وەللا ئەڤە ژی ئەخفتنەکا جوانە، بو تە 400 دینارێن دی! پیرەمێری ڤێ جارێ زیدەتر کرە کەنی، ڤێ جارێ ژی پاشایی پسیار ژێ کر و گوتێ ڤێ جارێ خێرە مام؟ وی ژی بەرسڤ دا و گوت: بخودێ مام بو خەلکی دار سالێ جارەکێ بەرهەمێ خو ددەت، ئەڤێ جارێ بو من د هەمان سال دا من دوو جارا بەرهەمێ دارا خو خار. ڤێ جارێ پاشایی جارەکا دی 400 دینار دانە ڤێ و رابی بەزی و خو هاڤێت و گوتە کەسێن دگەل خو یەلا دێ زیکا خو بدەنە پشت من. هەمییا گوتێ تە خێرە ئەزبەنی هیدی هیدی. وی ژی گوت: باوەرکەن ئەم دگەل ڤی مامی بمینن، خەزینا دەولەتێ هەمیێ دێ ژ دەست دەین و ئاخفتنێت وی یێ خوش خلاس نابن، ژبەر هندێ ژی هەکە ئەم نەچین ئەم دێ کەڤینە لەپێت خو!
ل ڤێرێ ژی بو مە گرنگییا ئاخفتنا جوان و ب رێک و پێک دیار دبیت، دبێژن کو ئاخفتنا جوان و ئاخفتنا کرێت ژ هەمان ئەزمان و هەمان دەڤ دەردکەڤن، ژبەر هندێ ژی باشترە ئەم ئەزمانێ خو هوسا بکاربینن کو تنێ ئاخفتنێت خوش ژێ بدەرکەڤن
نڤیسەر: احمد مصطفى
ژێدەر: وار تیڤی