شاشیێن لوژیکی هندەک رێکێن هزرکرنێ یێن خەلەت و نەدروست کو تە ژ هزرکرنا ساخلەم و ب بنەما ب هەر گوتنەکێ بهێتە گوتن دویر دئێخیت، ئاخفتنا لاواز دکەت، و دبیتە ئەگەر پێزانینێن خەلەت بەلاڤ بن، تاکەکەسان ژ هزرێن سەرەکی دویردکەت، و منگرتیێت نەدروست ل سەر هەر هزرەکێ چێدکەت. دەمێ ئاخفتن ب ڤان رێکێن خەلەت دهێنە گوتن، دبیت ل دەسپێکێ جهێ باوەرکرنێ بن، لێ هەر دەمێ تە ئێخستە بەر رەخنەگرتنا لۆژیکی، دکەڤن و خو ناگرن.
دبیت هندەک ژ وانا بێ مەبەست رویبدەن و ناڤ خەلکی بەلاڤ بن، لێ هندەک یێت دی مەبەست ل پشت هەنە دا کو هزرێن خەلەت بو هندەک ئەگەرێن کەسوکی و بەرتەنگ بهێنە بکارئینان و خەلکی سەرداببەن.
مفایێن زانینا ڤان خەلەتیێن لوژیک و هزرکرنێ:
- هزرا رەخنەگر بهێز دئێخیت
- شیانێن گەنگەشێ و دانوستاندنێ باشتر لێ دکەت
- تە ژ فێلبازیێن هزری دپارێزیت
- پەیوەندیکرنێ ناڤبەرا تاکەکەسان دا روون و ئاشکرا دکەت
- شیانێن بریاردانێ ل سەر بنەمایێن دروست چێدکەت
نموونەک ل سەر ڤان جورە شاشییا ئەڤەیە:
ئەگەر تو داخازا هندێ بکەی موچەیێت مە ژ بەغدا بهێن، تو خائینی و تە حەز ل نەتەوەیا خو نینە، تو ئان کوردپەروەری و دێ دژی هاتنا موچەیان ژ بەغدا بی، یان تو خائینی و تە نەڤێت کورد سەرکەڤن. چ رێکێت دی نینن!
ل ڤێرێ ل بەر شاشییا لوژیکی یا بەرنیاس ب "یان ئەڤە یان یا دی" تە ددانیت، ئانکو دێ دونیایێ ل بەر تە رەش و سپی کەت، چ رێکێ نادەت تۆ رەنگەکێ ریساسی ناڤبەرا وان دا ژێبگری، دگەل هەبوونا گەلەک و گەلەک جور بو ریساسیێ، هەر وەسا ناهێلیت ب ئێک جاری ژی تۆ چ رەنگەکێ دی هەما دەرڤەت ڤان هەمی رەنگان ژێبگری. ئانکو ل ڤێ شاشیێ دا رێکێ تنێ ل بەر تە دکەتە دوو هەلبژارتن.
ل دوماهیکێ، گەلەک جور یێن دی بۆ شاشیێن لوژیکی هەنە، دێ ل بابەتێن بهێت دا بەحسی هندەکێن دی کەین. سوپاس بۆ خاندنێ و هیڤیا مفایی
نڤیسەر: احمد مصطفى