خانمەکا گەنج هەبوو بناڤێ کلاریس ستارلینگ، فێخواز بوو ل ئەکادمییا FBIی، بشێوەیەکێ نەچاڤەرێکری ئەرکەکێ چالاکانە بۆ هات ئەو ژیک: نێچیرکرنا بکوژەکێ زنجیرەیی بناڤێ بافالۆ بێڵ. بەلێ ئاڵوزییەک هەبوو. بۆ هندێ دا بچیتە دناڤ مێشکێ ڤی بکوژێ فێڵباز دا، ئەو یا پێدڤی کەسەکێ دیتر یێ مەترسیدار بوو - دکتور هانیباڵ لێکتەر، دەروون پزیشکەکێ ژیر و دهەمان دەم دا هاتییە حوکم کرن وەک مروڤخورێکێ دەروونپیس.
کلاریس د زیندانەکا ئەمن بەرزدا چاڤپێکەفتنێ ب دکتور لێکتەری دکەت، ئەوێ لپشت دیوارێ شوشویی یێ ستویر هاتییە گرتن. لدەستپێکێ، گفتوگویێن وان د گرژ و کۆنتروڵ کری بوون. وی دەمێ وێ پێکول دکرن دکتوری رازیبکەت دهەڤبەشکرنا هزرێن وی سەبارەت عەقلێ بافالۆ بێڵی یێ وەرگێرای. بەلێ دگەل بەردەوامییا چیروکێ، پەیوەندییا وان دبیتە یارییا کتک و مشکان. ئارەزوویا دکتوری بتنێ هاریکاری کرنا کلاریسێ نینە؛ بەلکو وی دڤییا بچیتە دناڤا عەقلێ کلاریسێ دا و پرسیارێن کەسی ژێبکەت تا وێ نەچار بکەت رووبەرووی کویرترین ترسێن خو ببیت.
ل دەمێ کو کـلاریـس هەوڵددەت ب زویترین دەم بـافالۆ بێڵ ی براوستینیت، دکتور لـێکتـەر یارییا خو دەستپێدکەت ب سەردابرنا کەسێن دەورووبەرێن خو برێکەکێ کەس چاڤەرێ نەکەت. ئەڤ فیلمە پێلێن پێکڤە یێن سەرنج و ترسناک و دراما دەروونی ڤەدحەوینیت، تەماشەڤانا ب هەر دیمەنەکێ خو د جهـدا دهێلێت.
ئەو تشتێ فیلمێ بێدەنـگییـا کـارکــان نە ژبیرکری دهێلێت نە بتنێ پلانسازییا چیروکێ یە بەلکو کاریکتەرن ژیک. هانیباڵ لێکتەر یێ ئەکتەر ئەنتۆنی هوپکێنز رولێ وی دگێرێت، ئێکە ژ ترسناک ترین ئایکونێن مێژوویا فیلمان. ئەو یێ بترسە، بەلێ بشێوەیەکێ سەیر یێ کاریزماتیکانە یە، وە ل تە دکەت تو ژێ بترسی و دهەمان دەم دا بۆ سەرسامی ببی. جودی فۆستەر وەک کلاریس ستارلینگ نمایشەکا پر ژ لاوازی و هێزێ پێشکێش دکەت، ئەڤ رولە وێ دکەتە ئێک ژ لەهەنگێن هەرەبەرچاڤ د سینەمایێ دا.
دوویر ژ چیروکا باڵکێش، فیلم ژ روویێ بیراوی ڤە یێ تارییە و کلاوستروفۆبیکە، دگەل گەلەک دیمەنێن هاتینە گرتن ل جهێن تەنک و گرتی دا. کارێ کامیرەیێ و رووناهیێ دووپات دکەت لسەر وێ گرژی و ترسێ یێ فیلمی بەرەڤ پێشڤە دبەت، دێ بێژی تو دگەل کلاریسـێ دڤێ جیهانا مەترسیدار دا یێ داڤگرتی بووی.
نوکە ژی بهێلە ئەز دانپێدانێ بکەم: ئەز یا هەوەسدارم دگەل ڤی فیلمی. بێدەنـگییـا کـارکــان تەنها فیلمەکێ تریلەر نینە، بەلکو شاکاریکێ چیروکگێرانەیە، پرە ژ یاریێن دەروونی و کارێکتەرێن نەهێنە ژبیرکرن. هەر جارەکا بینەرییا ڤی فیلمی دکەم، خو دبینم چینێن نووی یێن چیروکێ شیکار دکەم، چ هێلێن نهێنی یێن دکتور هانیبالی بن یان ژیک ئەو رێکێن ب ووردی کارێکتەرییا کلارێسێ پێ گەشە دبن. ئەڤە ئەو جورێ فیلما یە، یێ دگەل تە دمینیت بۆ دەمەکێ درێژ و تە هانددەت تو حەز بکەی دووبارە و سێبارە سەرەدانا وێ جیهانا تاری و وەرگێرای بکەی.
بۆ وانا یێن باوەری ب رەیتینگا هەی، بێدەنـگییـا کـارکــان ل چەندین پلاتفۆرماندا نمرەیەکا نایاب هەیە:
The Silence of the Lambs
IMDb: 8.6/10
دگەل ڤان هەمی تشتێن هاتینە گوتن، ئەگەر هێشتا تە ئەڤ فیلمە نە دیتبیت، ئەڤە ئێکە ژ هەرە باشترین فیلمێن دەروونی-تریلەر ل هەمی سەردەمەکی. و ئەگەر تە دیبیت ژیک، رەنگە دەم هات جارەکادی تە ژڤانێ شیڤێ هەبیت دگەل هەڤالەکێ کەڤن.
نڤیسەر: چراک موختار
ترەیلەرا فیلمی: (trailer)