مروڤ ب سروشتێ خۆ چێکریەکێ جڤاکی یە، و حەزا تێکەلیبوونێ دگەل کۆمەڵێن دیتر یێن مروڤان هەیە، هەر بگرە ژ دەستپێکا پەیدابوونا گوندان، تا دگەهیە ڕێکا حەریری مروڤان چەندین ڕێک گرتینە بەر بو تێکەڵی ئێکبوونێ، دگەل بوورینا دەمی و ب پەیدابوونا زمانێن جودا جودا، کەلتوورێن جیاواز هاتنە هەبوونێ، ئەڤێ چەندێ ژی کارتێکرنەکا ئێکسەر لسەر پەیوەندیێن مروڤان کریە.
ڕێکێن تێکەڵ بوونێ دگەل کۆمەڵێن جودا یێن مروڤان د زۆر بوون، یا ژ هەمیان سەرەکیتر بازرگانی بوو، کو ب ڕێکا بازرگانییێ کەلتوور، ژینگەھ، و وەڵاتێن نوی دهاتنە ڤەدیتن. ب ڤی شێوەی چەندین تەکنیک و زانین ژ جڤاکلن هاتینە ڤەگوهاستن، بەلێ هەر بتنێ ئەڤە بوو و ب ڕادەیەکێ زۆر کێم کەلتوور ژی د هاتنە گۆهورین.
لێ ئەگەر ئەم نێرینەکێ بۆ جیهانا میدیا جڤاکی بکەین، دێ بینی کو دوو کەس ب دویراتیا سەدان کیلۆمەتران ب هەبوونا جیاوازیا کەلتووری ژی یێ ب ڤیدیۆیەکا دیارکری پەیوەندیێ دروست دکەن، ب دروستکرنا ڤێ پەیوەندییێ چەندین بابەت دووبارە پێناسە کرینە، بگرە ژ بابەتێن سیاسی، ئابووری، جڤاکی، و کەلتووری.
بەشەکێ گرنگ ژ میدیا جڤاکی لێکگوهاڕتنا کەلتووری یە، کو زۆربەیا جاران کەلتوورێ باڵا کارتێکرنێ ل کەلتوورێ نزم دکەت، ئەڤ کارتێکرنە دبیتە ئەگەرێ بەرهەڤکرنا تاکی بۆ وەرگرتنا کەلتوورەکێ دی. جودا ژ ڤێ چەندێ، میدیا جڤاکی کەلتوورەکێ ئێکگرتی بوو مرۆڤان دروست کریە، کو دەمێ هەر پلاتفورمەکێ تو بکاربینی دێ لدویف وان ڕێسایێن ڤەشارتی چی کو بۆ هەر پلاتفورمەکێ هاتینە کێشان.
ڕاستە میدیا جڤاکی هەمی سنوران د بەزینیت، بەلێ یا ڕاست دگەل بەزاندنا سنوران هندەک سنورێن دی بو مروڤان دروست دکەت.
ژ لایەکێ دیتر ڤە میدیا جڤاکی پیڤەرێن ئیستاتیكیا یێ ب بەردەوامی د گۆهوریت، ب شێوەیەکی د دەمێن بوری دا پێدڤی ب چەندین ساڵان بوون داکو تشتەک ب دیتنا جڤاکی ببیتە جوانی، لێ د نوکە دا ئەو کەلوپەلێن ئەڤرو بۆ جوانیێ بکاردهێن، سۆباهی چ بهایێ خۆ نابیت.
ژ لایێ سیاسی ڤە میدیا جڤاکی ڕۆڵەکێ سەرەکی دبینیت د پێشڤەبرنا پرسگرێکێن سیاسی، کو بوویە پەنجەرەک بو ڤەگوهاستنا بویەرێن نیڤدەولەتی، ئەڤە دبیتە ئەگەرەک کو هۆشیاریا سیاسی زێدە ببیت و تاک پتر بەرەف داخوازکرنا مافێن خۆ یێن سەرەتایی ڤە بچیت.
نڤیسەر: دانەر رێبەر
ژێدەر:
- Steger, M. B. (2009). Globalization: A Very Short Introduction. Oxford: Oxford University