گەنج لسەردەمێ نوی دە روبروی ئاستەنگێن مەزن دبن بۆ دەربازبونا وان دبازارێ كاری دە . ئەڤە ژی ئەنجامێ گۆرانكاریێن بلەز یێن د ئابورێ جیهانی دە رویددەن هەروەسا پێشكەفتنا تەكنەلۆژی رۆلێ خۆ دگێریت . دهەمان دەم دە رێژا دەرچویان یا سالانە دزێدەبونێ دە یە .
لەورا بدەستڤەئینانا كارەكی یان وەرگرتن ل پێشەیەكێ لدیف زانین و باوەرناما گەنجی دبیت كارەكێ بزەحمەت بیت . ژ بەربەلاڤترین وان ئاستەنگان كو روبروی هەر گەنجەكی دبیت دبازارێ كاری دە ، هەڤركیەكا مەزن هەیە لسەر دەلیڤێن كاری و پێتڤی و شارەزایا بۆ وی كاری دڤێت پتریا جاران ناگونجیت دگەل وان گەنجێن نوی دەرچووین، زێدەباری سروشتێ كاری یێ كو پتریا جاران پشتا خۆ ب شیانێن تەكنەلۆژی دبەستیت.
ئەڤ ئاستەنگە گەنجان پال ددەن كو ب بەردەوامی خۆ پێشڤەببەن و كار لسەر شیان و زانینا خۆ بكەن ب بەردەوامی .
لدەمێ زێدەبونا دەرچوویان ژ زانكۆ و پەیمانگەهان سالانە، هەڤركی زێدەبوو لسەر دەلیڤێن كاری یێن لبەر دەست ژ هەر دەمەكێ دی پتر . ئەڤ هەڤركیە نە بتنێ دناڤ گەنجێن ناڤخۆیێ وەلاتی دا هەیە بەلكو ل هەمی جیهانێ یا هەی ژ ئەگەرێ جیهانگیریێ و ساناهیا ڤەگوهاستنێ دناڤبەرا وەلاتان دە . دگەل هەبونا رێژەكا دەستنیشانكری ژ دەلیڤێن كاری بەراورد دگەل رێژا پێشكێشكەر و داخازكەرێن كاری , گەلەك گەنج نەچار دبن رازی ببن ب كارێن دەم كورت یان كاركرن نە دبوارێ خواندن و زانینا وان یان باوەرناما وان هەی .
هەروەسا گەلەك كۆمپانی رادبن ب كێمكرنا كاركەران و پشتگرێدان ب تەكنەلۆژیایێ و زیرەكیا دەستكرد لجهێ كارێ مرۆڤی . ئەڤ چەندە هەڤركیێ زێدەتر لێدكەت و و گەران لدیڤ كارەكی دبیت ئاستەنگەكا مەزن دناڤ گەنجان دە .
- ژ بۆ روبروبونا وان ئاستەنگان یێن دهێنە درێكا گەنجان دە ل بازارێ كاری دە دشێین پشتا خۆ ب هندەك رێك و چارەسەریان ببەستن كو هاریكاربن ژ بۆ كێمكرنا هەڤركیێ و بدەستڤەئینانا دەلیڤێن پتر
- پێشڤەبرنا شیانان، دیڤچون و فێربون و زانین تشتەكێ گرنگە ژ بۆ بدەستڤەئینانا شیانان د بوارێن جۆراوجۆر دا ، ب تایبەت دبوارێ تەكنەلۆژی دە و ئەو بوارێن بازارێ كاری داخوازیەكا زێدە لسەر هەی، وەكی بەرنامەسازی و شرۆڤەكرنا داتا و پێزانینان و برێڤەبرنا پرۆژەیان . كۆرسێن فێركاری و باوەرنامێن باوەرپێكری دشێن گەلەك دەرگەهان بەرانبەر گەنجان ڤەكەن
- فێربونا بەردەوام و راهێنانێن پراكتیكی ، براستی ژی دشێت چارەسەریەك بیت كو گەنج دشێت مفای ژ بەرنامەیێن پراكتیكی و خۆبەخشی وەرگریت . و شارەزایا پراكتیكی دەلیڤا بدەستڤەئینانا كاری پتر لێدكەت.
زێدەباری هندێ گەنج دشێت لدیڤ دەلیڤێن كاری بگەریت ل بازارێن جیهانی دە . دگەل بەرفرەهبونا جیهانگیریێ گەنج دشێن لدەلیڤێن كاری بگەرن ل دەرڤەی سنورێ دەولەتا خۆ دە، دبیت بازارێن جیهانی ژێدەرەكێ باش بیت ژ بۆ كاركرن و دامەزراندنێ بتایبەت ل وان كەرتان دە كو وەلات بدەست كێمیا شەرەزایا كاركەران د وی كەرتی دا دنالیت دناڤخۆیێ وەلاتی دە. هەروەسا كاركرن ژ دوور ژی یا زێدە بوی ، كو گەنج دشێن پەیوەندیێ ب كۆمپانیێن جیهانی بكەن و كار بكەن لهەر وەلاتەكی ژ مالا خۆ ، لێ هەتا گەنج بشێن ل ڤێ هەلبژاردنێ دە كاربكەن فەرە شیانێن خۆ یێن زمانی و رەوشەنبیری پێشڤەببەت هەروەسا شیانا خۆگونجاندنێ هەبیت بۆ كاركرن ل ژینگەهێن ژێك جیاوازدە.
و ل دوماهیێ دشێم بێژم كو ئەو ئاستەنگێن روبروی گەنجان دبن ل بازارێ كاری دە خۆ گونجاندن و پێشڤەبرنا بەردەوام یا شیانا و زانینێ پێ دڤێت . هەڤركیا زۆر و گۆرانكاریێن تەكنەلۆژی ئەڤ هەمی ئەگەر كارتێكرنێ لسەر گەنجان دكەن ، لێ برێكا پێشڤەبرنا شیانان و بدەستڤەئینانا شارەزایا پراكتیكی دشێن لسەر ڤان ئاستەنگان زالببن و سەركەفتنێ بدەستڤە بینن.
نڤیسەر: نورهان علی
ژێدەر:
- رێكخراوا كاری یا جیهانی (ILO) . راپۆرتەك لسەر بازارێ كاری یێ گەنجان
- بانكا نیڤدەولەتی . ئاستەنگ و دەلیڤێن گەنجان لبازارێ كاری دە