گوتار ب گەلەک رێک و شێواز دهێنە نڤیسین، بەحس ژی ل گەلەک بابەتان دکەن. ل ڤێ پارچە نڤیسینێ دێ هندەک ژ بەربەلاڤ ترین جور و شێوازێت گوتاران کەین، یێن هوسا کو گەلەک دهێنە خاندن ژ لایێ بینەران ڤە.
1. گوتارێت دەربڕینا بوچوونان: دەربڕینێ ژ بوچوونێت نڤیسەری یێت کەسی ل سەر بابەتەکێ، بوچوونێت تێدا دهێنە گوتن رێژەیی نە و ب پشت بەستن ب ڤەکولینان یان لوژیکێ دهێنە گوتن.
نموونە: گرنگییا پاراستنا زمانێ کوردی ل هەمبەر جیهانگیریێ.
2. گوتارێت دێ چاوا شێم؟: رێکەکێ پێنگاڤ پێنگاڤ ددەتە دیار کرن ل سەر چاوانیا کرنا تشتەکێ یان ژی ب دەستڤەئینانا دەرئەنجامەکێ.
نموونە: دێ چاوا فێری زمانێ کوردی بم؟ رێبەرێ فێربوونا هەردوو زاراڤێن بوهدینی و سورانی.
3. گوتارێت لیستەیان: گوتارن کو لیستەکا تشتان پێشکێشدکەن، گەلەک ساناهی نە بو خاندنێ و پتر بەحسی ئاموژگارییان یان کومەکا پێزانینان وەک لیستە دکەت.
نموونە: 10 رێک بو باشترکرنا ساخلەمیێ
4. گوتارێت پێداچوونێ: پێداچوون ب بەرهەمەکێ، خزمەتگوزارییەکێ یان ژی فیلم و پەرتووکان دکەت. ژ باشی و خرابیێن وی تشتی پێک دهێت دگەل گوتنا هندەک ئاموژگارییان.
نموونە: پێداچوون ب سینەما کوردی: باشترین فیلمێن کوردی کو پێدڤییە تو ببینی.
5. گوتارێن پرۆفایل: وەسفەکا ب هویری بۆ کەسەکێ، کومپانیەکێ یان ژی رێکخراوەکێ، بەحسی باگراوەند، دەستکەفت و تایبەتمەندیێن وان دکەت.
نموونە: هندەک ژ داهێنەرێن کورد یێت کو دەستپێشخەریێن تیکنولوجی هەین بنیاسە.
6. گوتارێن کەسی: وەک پیروبوچوون و پێداچوونێن رێژەیی ل سەر ژیانا نڤیسەری یێت کەسی نە. ب شێوەی چیروک بەحسی لایەن و سەربورێن ژیانا مروڤی دکەت.
نموونە: مەزن بوون ل هەرێما کوردستانێ: چیروکەکا ناسناما من.
7. گوتارێن پێزانینان و روونکرنێ: پێزانینان ب هویری ل سەر بابەتەکێ، تێگەهەکێ یان پروسێسەکێ ددەت، بابەتەکێ ئاشکرا و روون دکەت.
نموونە: حکومەتا هەرێما کوردستانێ: تێگەهشتن ب پێکهاتەیێن سیاسی یا ڤێ دەزگەهێ.
8. گوتارێت بەراوردکرنێ: بەراوردکرنا دوو یان پتر ژ بەرهەم، خزمەتگوزاری، هزر، یان تێگەهان. دیارکرنا وەکهەڤی و جیاوازییا وان و دانا هندەک ئاموژگارییان ل سەر بابەتی.
نموونە: کورمانجی و سورانی: بەراوردکرنا هەردوو زاراڤێن سەرەکی یێن زمانێ کوردی.
9. گوتارێت مێژوویی: بەحس ل رووداو، کەس، یان ژی لڤینێت مێژوویی دکەت، ژینگەها وان رووداوان دگەل شیکارکرنێ و پەیوەندیێ ب سەردەمێ نوکە دا دیار دکەت.
نموونە: خەباتا کوردان بو سەربەخۆ بوونێ: دیتنەکا مێژوویی بو گرنگترین رووداوان.
10. گوتارێن پسیار و بەرسڤ: وەک پسیار و بەرسڤ دهێتە چێکرن ل سەر بابەتەکێ، هەڤدیتنەکێ، یان ژی پسیارێن بەربەلاڤ بو خواندەڤانان.
نموونە: پسێارێن بەربەلاڤ ل سەر فێربوونا زمانێ کوردی: بوچوونا تایبەتمەندێن زمانی.
ل دوماهیکێ ژی، گەلەک رێکێت دی یێت هەین گو گوتار پێ بهێنە نڤیسین، لێ ئەڤە بەربەلاڤ ترین و پڕ مفاترین رێکن کو بەلاڤە دبن ل سەر مالپەرێت زمانێت دی وەک عەرەبی و ئنگلیزی. هندەک جورێت دی ژی یێت هەین یێت ئەم ل کورداخ بەلاڤە دکەین وەک کورتکرنا پەرتووکا، وێژە و کورتە چیروک، و بابەتێن ساخلەمی. مالپەرێت زمانێ کوردی کو گوتارا ب ڤی شێوازی بەلاڤ دکەن گەلەک کێمن، و ل سەر گەلەک بابەتا چێنەکرییە و بەرفرەهـ نڤیسینێن هوسا بەلاڤ نەبووینە. ئەم ل کورداخ هەولددەین پتر نڤیسینێن هوسا بەلاڤ کەین دا کو ناڤەروک و بەرهەمێ زمانێ کوردی ل سەر ئینتەرنێتێ دەولەمەند بکەین. دبیت ئەم تیمەک بچیک بین لێ دبیت پروژێ مو دەسپێک بیت بو بەلاڤ بوونا مالپەرێت هوسا ب زمانێ کوردی. ئەگەر تە دڤێت دگەل مە پشکدار بی، سەرەدانا لینکێ “ببە خوبەخش” ل بنێ مالپەرێ مە بکە.
پسیار: ئەرێ تو دبێژی ئەڤ گوتارە دکەڤیتە بن کیش جور دا؟
نڤیسەر: احمد مصطفى